張敬軒親湯怡激烈床戲被刪

歌手張敬軒（軒仔）與藝人湯怡（Kathy）昨日出席英皇珠寶全新「Heartbeat」時尚系列宣傳活動，戴上飾品現身的軒仔高興表示可與此系列crossover打造新歌《找對的人》，還即席演唱新歌，令現場人士聽出耳油！軒仔續表示MV邀請了Kathy擔任女主角，還大讚她非常抵得諗，烈日當空下拍攝曬燶了亦無半句怨言。

曾合作不感尷尬

軒仔透露花了不少心思在MV的橋段內，是近百萬元的大製作，儼如一部微電影：「拍呢個MV嘅使費等於拍4至5隻MV，多4至5倍製作費。」問到MV內有否親密鏡頭？軒仔笑言由頭親到尾，又透露因尺度激烈關係而被刪減了床戲：「有少少錫，但再親密啲鏡頭就cut咗，（有咩再親密啲？）因為係情侶首飾，所以劇情需要都有床上親暱鏡頭，不過cut咗，導演想點到即止。」Kathy又謂因與軒仔非第一次合作，故不會感到尷尬。

軒仔找湯怡拍MV，獲英皇鐘錶珠寶主席楊諾思（中）贊助。

軒仔與湯怡於MV內有不少親暱場面。

讀珠寶鑑證課程

軒仔又謂在MV內飾演一位珠寶設計師，現實中亦正在修讀珠寶鑑證課程：「我依家都考緊珠寶鑑證牌，要讀三個月，一嚟自己想學多啲嘢，二嚟唔知幾時唔唱歌轉行，依家珠寶好好做，（會自己設計埋？）會o架，所以讀呢科。」

另問到下月生日的Kathy將如何慶生？她表示：「應該開緊戲，我諗同阿Ken（男友洪卓立）食餐飯，簡單度過。」又謂會叫軒仔送兩張演唱會門票給自己做生日禮物。

文：名人組