陳凱琳神秘禮物送嘉穎驚喜
前港姐陳凱琳（Grace）日前到鬧市拍新劇，她表示已買下一份充滿心思的禮物給早前生日的男友鄭嘉穎，但要等對方返港才可拆禮物。提到將與同劇的蕭正楠拍咀戲，Grace笑言不需向嘉穎備案，大家都非常信任對方！
無綫小花陳凱琳日前在佐敦的金舖拍攝劇集《巨輪II》，劇情講述她與飾演其兄長的張致恒（Steven）買珠寶氹父親吳岱融，Grace表示今次角色個性複雜，會趁機向前輩吳岱融偷師，談到劇情在金舖取景，Grace笑認有收過異性的貴重禮物，但她重視心意多於價錢，問到是否包括男友鄭嘉穎？她即怕醜說：「唔講呢啲呀！（之前嘉穎生日，有冇送禮物畀佢？）買咗喇！但都要等佢返港先補送。（咩禮物？）秘密！相信佢會鍾意！都有心思嘅！」提到與蕭正楠將有咀戲，她笑言尺度可以接受：「拍出嚟係美感同浪漫！（同嘉穎備案？）大家都好放心對方工作，有時同身邊人講吓做啲咩，唔係話交代，只係普通傾偈。」
吳岱融讚演技好
Steven笑言與Grace演兄妹一拍即合，兩人都是「鬼鬼地」及「正能量王」！他表示曾花五位數買首飾給母親，至於有否買來冧女友莊端兒？他笑說：「我成份糧幾乎畀晒佢啦！佢鍾意買咩就買咩！（幾時買求婚戒指？）未呀！但我有朋友可以幫手設計！」
久未在香港電視圈出現的吳岱融去年開始返TVB拍劇，早前已拍過古裝劇《刀下留人》，今次在《巨輪II》中再演反派，問到再拍港劇有否不習慣？他笑說「都OK」！對於Grace的演出，吳岱融就讚不絕口：「比我想像中好！呢一代可能好易吸收資訊，好醒目！」
文：影視組