林家棟再做監製 領生力軍發圍
林家棟找來兩位影壇新人J.Arie與林德信為他的第二部監製作品擔任男女主角，他坦言合作前並不認識二人，純粹憑一眼的印象就選定對方。J.Arie在新片中與林德信合譜浪漫戀情，但卻爆粗多過感情戲！
新片《死開啲啦》是林家棟監製的第二部作品，由歌手J.Arie（雷琛瑜）夥拍型男林德信（Alex），並由新進導演梁國斌執導。兩位主角均屬影壇新面孔，家棟指二人雖然經驗尚淺，但相當快投入角色，他對二人的表現亦相當滿意：「因為佢哋之前嘅演出唔多，相信大家睇完佢哋表現會有驚喜，希望影壇畀新人多啲機會。」
J.Arie試鏡冇準備
首次擔任電影女主角的J.Arie，對於突然有機會前來敲門又驚又喜，她表示：「其實收到家棟電話嗰刻覺得好奇怪，自己之前冇演戲經驗，亦唔知試鏡有乜準備，去到點知一傾就4、5個鐘，冇準備冇得掩飾，乜底細都畀佢起晒！」J.Arie在戲中與Alex合譜浪漫戀情，但戲中甚少拖手咀嘴等感情戲，反而不時爆粗！問到未能與圈中型男親熱會否可惜？她笑說：「睇番playback有嗰種甜絲絲嘅感覺。」而拍檔Alex則大讚她相當快上手：「佢第一次拍戲已經好叻，自己之前都係咩都唔識，見佢掌握好快，而且佢嘅角色有好多情緒，唔易演，好欣賞佢演得好好。」
Alex自認紳士
Alex飾演一位紳士殭屍，與J.Arie有不少氣氛浪漫的對手戲。問到現實中是否一位紳士？Alex笑說：「都係，其實要做到都算簡單，做Gentleman係必要嘅。（為人浪漫？）自己唔係浪漫嘅人，因為唔太識去表達自己。」外形俊俏的他，難免被外界標籤為「花弗男」，Alex坦言希望透過作品表現自己：「自己都冇留意人哋點睇我，外人會留意你嘅私人事，我希望做多啲作品去令大家認識我，而今次嘅演出就係一個好機會。」
文：影視組
場地：ISSY MASON Cafe