陳凱琳穿越玩歷險情陷三角戀

由陳凱琳、洪永城、陳展鵬、傅嘉莉等主演的台慶劇《張保仔》將於下周一首播，新劇耗資3000多萬，於香港、橫店影城以及無錫太湖等地取景，配合電影級的視覺特效與CG動畫技術，打造出雄偉的海上戰爭場面。監製梁材遠希望透過電腦特效與強勁又具新鮮感的演員陣容，令觀眾耳目一新。

洪永城愈演愈威猛

在劇中飾演女警的陳凱琳（Grace）機緣巧合下穿越二百年，回到清代的赤臘角海戰場，巧遇飾演張保仔的洪永城（Tony）以及其死敵貝勒爺陳展鵬，除了展開一段海上歷程，更與二人展開一段錯綜複雜的三角關係。而男女主角之一的陳凱琳與洪永城均首度擔正，監製大讚二人孭飛要角未見壓力，他說：「我哋第一日開鏡就掟咗Grace落水，佢仲要第一次吊威也、喺綠幕前演戲，佢都冇喊冇投訴，佢係一個天真可愛嘅女仔，啲戲好真，而佢個角色就好似羅拉，好有冒險精神。」問到Tony有否表現出「港版魔盜王」的氣勢？監製笑說：「佢剛埋位時感覺唔夠威，因為同劇其他演員演技都好壓場，不過佢後面就慢慢展現出角色嘅威猛，相信大家會覺得佢好適合呢個角色。」

黃智雯與陳山聰在劇中飾演一對，鬧出不少笑話。	洪永城飾演的張保仔是七海之首。	陳凱琳和陳展鵬展開霧水情緣。

零下4℃凍到嘴硬

Grace談到新劇被選為台慶劇，她興奮表示：「套劇拍咗半年，有好多回憶，雖然擔正有壓力，但自己盡咗全力去演，依家睇番片段覺得好值得，有好大回報，又發現原來自己可以去到咁盡！（拍劇有難忘事？）有好多，試過零下4℃喺瀑布度拍，凍到嘴都硬埋講唔到對白！同蔣志光、金剛、戴耀明一班海盜演戲又好好笑，佢哋角色好輕佻，仲要輪流發放笑彈。而同邵美琪對戲就學咗好多內心戲嘅演繹，有好多火花同得着。」

文：影視組