黎瑞恩超市暈低抽搐零反應

黎瑞恩受訪承認暈倒送院，答謝途人幫忙急救。（資料圖片）

據讀者報料，本周一（即14日）下午一時左右，阿恩跟傭人到沙田一超市購物時，突然眼前一黑暈倒並全身抽搐，臉部肌肉摵埋一邊，口吐白泡，超市職員即上前照顧並報警，有位女士也幫忙為阿恩急救，但見眾人拍打、搣她，她都全無反應，她的傭人嚇到面青兼方寸大亂，不停呼喊阿恩。

「條脷損咗腫晒」

阿恩昨日接受本報電話訪問，承認暈倒入院：「唔知做乜，去超市諗住買啲嘢，望住啲汽水突然覺得好多影，以為老花企得近，問工人係咪好多影，隻眼矇矇地，跟住就眼前一黑暈低，之後發生咩事我完全唔知，事後聽朋友講番，話我全身抽搐，有個女仔撳我手指公個穴位，佢仲想伸手入我口，但撬唔開，我條脷損咗腫晒。」暈倒前的阿恩毫無徵兆：「之前我啱啱食完飯，未試過咁，唔知點解，入院時血壓好低，我一向偏低，唔好睇我肥屍大隻，照咗腦電波，做晒腦掃描、磁力共振，全部冇事，都好奇怪。」問到與腫瘤可有關係？她稱兩周前檢查過，腫瘤的癌指數近乎正常，故應無關。阿恩不忙多謝超市職員及為她急救的女士：「多謝佢仗義相救。」

黎瑞恩閒時會到超市購物，日前卻發生意外。（資料圖片）

黎瑞恩日前突然暈倒，相信嚇壞好友湯寶如（左）和劉小慧。