黃家強聞Paul扯火拒破冰
任賢齊、黃家強、蘇永康（蘇康）及梁漢文即將聯手攻入紅館，但未開騷已聞到陣火藥味，成功「過檔」男人幫的蘇康及梁漢文竟「變節」，喪踩之前組合BIG FOUR是商業化的搵錢工具。而當蘇康提議找黃貫中（Paul）做嘉賓時，家強寸爆講明拒絕「Paul」冰，絕不與對方同台！
由任賢齊、黃家強、蘇永康及梁漢文組成的組合男人幫，將在11月27至29日假紅館舉行「男人幫演唱會2015香港站」，並預告在內地、台灣等地開巡迴騷。昨日他們以機師造型出席記招，在出場前大會播放的宣傳短片中，出動價值四百萬的名車及由方力申借出的三輪電單車，相當架勢。
狂踩舊戰友
身為唱片公司老闆的小齊早前指男人幫是「搖錢樹」，稱若組合受歡迎可以登台商演賺錢。問可會像BIG FOUR一樣巡迴瘋狂吸金？怎料BIG FOUR成員之一的蘇康「反轉豬肚」說：「不能相比呀，BIG FOUR百分百商業化，我哋男人幫有十六首歌，BIG FOUR『He Ha Hea』四首歌就話出騷啦！」梁漢文也加入戰團踩自己友：「賺盡咗所以咪過嚟男人幫囉，反轉豬肚就係屎呀。」家強加多腳笑說：「嗰個純賺錢(o架)咋，不吃回頭草呀，唔好諗過去啦！」記者會後，梁漢文擾攘一會才受訪，其餘三子即抽乾「４個小生」，蘇康笑說：「我好似謝賢咁星巴佢！」至於揸收音咪的小齊亦抽水問：「揸咪嗰個叫咩名話？」
妻兒陪走埠
對於家強曾與前樂隊成員Paul兄弟反目，問是否Beyond合體無望才加入男人幫？他說：「唔關事，Beyond永遠開唔到騷，就更加要搞，依家我咁講（o者），我可以反口，呢個世界有幾多反口覆舌嘅人，唔爭在我。」當「和事老」蘇康提到盼請葉世榮及Paul擔任演唱會嘉賓時，現場火藥味即時飆升，家強寸嘴說：「阿Paul淨係同你Jam歌得啦！我同張衞健、安仔Jam。」蘇康即打圓場稱：「又得，我同佢合作過，有乜所謂！」
問到在巡唱時，他們的另一半可會做「跟得夫人」同行？他們說：「睇地方啦，內地有十幾個地方，睇吓遠唔遠，辛唔辛苦。」而家強預告會自費帶老婆及小朋友走埠。
文：音樂組