胡定欣接送男友冤氣唔願走

快將34歲的胡定欣與拍拖兩年多的廣告界才俊沈栢淳分手後，dry足半年多，最近與比她年長十三年的著名音樂人陳明道（Terry）拍拖，Terry曾為王菲、張敬軒、容祖兒等歌手擔任音樂總監，早前在無綫節目《今晚睇李》中擔任band leader，可謂近水樓台。

深情對望依依不捨

定欣與Terry拍拖數月已打得火熱，甚至過半同居生活，為箍住男友歡心，定欣無論工作多忙，仍抽空陪男友。日前下午2時半，她駕駛白色寶馬座駕，載住到大陸出騷的Terry離開將軍澳香閨，直駛紅磡火車站轉乘中港直通旅遊巴，車子駛至上落客區後，兩人在車廂內傾足十五分鐘還未落車，難捨難離之下再兜多一個圈返回原位，始見Terry單拖落車，並往車尾搬出結他及行李，再跟女友say bye，又叫她小心揸車，素顏的定欣調低車窗與男友深情對望，依依不捨地目送他離開。

胡定欣依依不捨目送男友陳明道離開。	陳明道自定欣車尾箱搬出行李及樂器。	左起：陳明道與胡定欣，在朋友圈中已成一對。

據知定欣和Terry感情一日千里，兩人已有結婚共識並隨時好事近，昨日本報致電定欣，問到是否經常管接管送？她甜笑表示兩人會互相照顧：「幾sweet嘅！唔係話車出車入，我哋會『互車』。（計劃結婚？）依家開心就足夠，將來嘅事遲啲先算。（同居？）佢自己有住嘅地方，我住將軍澳，近公司嘛！」有傳好姊妹胡杏兒年尾出嫁，定欣笑言：「我哋睇杏兒頭，唔會超越佢，家姐未嫁，做妹嘅點都會等佢嫁咗先。」

黃智雯：想佢快過我

身為定欣好友的胡杏兒，對於Terry讚不絕口：「Terry好好人，最緊要佢哋開心，唔好成日寫定欣釣金龜啦！佢都冇，佢係個好女仔，總之我撐佢，開心就得。」另一姊妹黃智雯亦不擔心被定欣爬頭：「戥佢開心，都想對方快過我，證明佢哋感情好穩定啦！」文、攝：追蹤組