呂方call徐小鳳變詐騙電話

呂方前晚舉行《呂方代表演唱會》首場,請來徐小鳳和汪明荃,但就成為被取笑對象,近日電話騙案層出不窮,徐小鳳笑言以為呂方來電時是詐騙電話,心想要否給他二千萬元,汪明荃則大爆呂方開騷前仍食飯,直言:「人哋開騷幾舊肌肉,你得一『劈』,竟然夠膽上紅館!」

歌手呂方一連兩場紅館《呂方代表演唱會》前晚首場演出,碌盡人情牌的他請來徐小鳳及汪明荃擔任嘉賓,徐小鳳以經典白底黑波點傘裙造型登場,而近日電話騙案不斷,她回想當初呂方致電邀她做嘉賓,笑言一度以為是騙案:「我心諗做嘉賓使唔使畀二千萬元你?」她又笑言聽傳聞指呂方操肌,直言怕他如杜德偉般着三角褲開騷:「好彩你冇!你四四方方幾好呀,雖然唔高大,但聲音似巨人!」二人又大擺Pose影相,徐小鳳更舉V賣萌,表現興奮!

女神汪明荃爆料

呂方在介紹汪明荃出場前,賣關子指對方是自己的女神,怎知道有觀眾大嗌舊愛鄭裕玲(DoDo)的名字,令他嬲爆表示:「你再咁講我真係嬲,我好小器,雖然我同好多阿姐有緣,但呢個世界上有好多阿姐,其實嗰個係汪明荃!」

隨後汪明荃身穿白袍、手拎面具現身唱出《華麗轉身》,又除下白袍,身穿白色連身裙跳唱《閃爍登場》,當呂方重回舞台後汪明荃大爆他的秘密:「前幾日練歌,點知畀我發現佢捧住(觀眾大叫:女人!)乜成日講女人(口架)!你幾時帶嚟見我?」呂方即賣口乖說她就是自己的女人,汪明荃繼續說:「佢捧住個飯盒!你仲食飯,人哋開騷幾舊肌肉,你得一『劈』,竟然夠膽上紅館,梗係Sell靚聲!」

想同倫永亮結婚

除了兩位重量級嘉賓外,身為音樂總監的倫永亮(Anthony)亦有唱兩嘴,呂方為帶動台下氣氛,在唱《月滿抱佳人》時叫Anthony教唱歌,他在教唱「Amour Amour」時,慢慢由「Amour」變成「阿摸吓摸吓」,之後更發出怪聲,被呂方叫停說:「有啲兒童不宜!」呂方笑言為表感謝,想和Anthony結婚。

另呂方後來受訪自爆,在十多歲時遇疑似騙徒:「約咗同學個妹去公園玩,佢問我借筆,借咗就再未見過佢啦,支嘢(筆)幾百蚊o架。」

文:音樂組