顧芮寧街頭騷 校長突襲拍片
歌手顧芮寧（Elaine）昨日在尖沙咀街頭的貨車上舉行新歌發布會，吸引半百圍觀者，期間譚詠麟（校長）突然現身，並混入市民堆用手機拍下Elaine表演情況，當Elanie發現校長時嚇一跳說：「真係好激動，連結他都彈錯晒。」由於對方正式加盟環球唱片，抵死的校長即場遞上唱片公司員工證。
公司一早睇中
問到校長是否親自向環球推薦Elaine？校長說：「唱片公司一早已經睇中佢，覺得佢好有潛質，因為合約同條件要傾，同埋要等佢作新歌，比我預期遲咗個半月先發布。」並透露有留意今年樂壇新人，坦言欣賞英皇新人陳凱彤。對於好友陳百祥（阿叻）日前擔任港姐決賽司儀，校長笑說：「佢件衫好似隻熊咁，冇咗條頸，要引以為鑑。」亦不覺鄭裕玲寸阿叻「唔識執生」。
而Elaine坦言事前不知校長會到場，問到對年尾各大頒獎禮有否信心？Elaine說：「要靠大家支持，音樂方面我好盡力，仲同好多優秀嘅人擦出火花，希望有好成績。」由於她的新碟找來多位音樂人合作，問到是否由校長出面拉攏？身旁的校長即說：「係唱片公司嘅功勞，大家一齊努力嘅成果。」文：音樂組