ZolarWind音樂夢不死

太陽娛樂旗下的樂隊ZolarWind由黃柏高一手發掘，新歌《七百萬個小宇宙》教人勇於追夢，不要輕視身邊每個小角色，歌詞背後原來各人也有另一番故事。

被前輩藐爆

結他手湯美自小懷着一團音樂火，入行前在錄音室當技師仔，每日只能看着別人玩音樂，卻沒有他的份兒：「覺得好辛苦，當時有個目標就係儲錢去外國學結他，所以堅持每日放工就練結他。最後成功去到外國讀音樂，啲同學仔就會笑我，話我為興趣竟然嘥咁多錢，覺得我戇居。」幸好最後「彈」出血路，被內地歌唱比賽《我是歌手》欽點擔任結他手。

湯美（左起）、波子、Quinn及藝琛入行前都有一段辛酸往事。

鼓手波子曾做「音響咕喱」，但最終「打」出名堂。

女主音Quinn試過被前輩藐爆，幸好她用實力證明自己：「唔好睇小每個人，就算機械冇咗一粒螺絲都唔得啦。我覺得每人入行時都會遇到呢啲情況，好多人覺得我呢啲o靚妹行開啦！我咪只好忍耐，做好自己。」鍵琴手藝琛雖然在行內經驗豐富，做過不少歌手的音樂監製，可是他也試過觸礁：「我做唱片試過有公司搵我編歌，但大家諗法唔一樣，有時覺得好難頂，根本唔make sense、唔好聽，雖然當下未做到自己心入面嘅嘢，但千祈唔好磨蝕自己。」

做音響咕喱

鼓手波子在音樂路途上亦曾經失意，最終被迫轉行搬運音響：「行內人覺得我打得太花巧，演唱會通常想要穩陣，有段時間幾洩氣，冇工開，要推音響幫手set場，即係『音響咕喱』囉！但我一收工就去練鼓，道火係唔會熄。」最終「打」出個未來，有幸為歌神陳奕迅巡唱擔任御用鼓手。

文：音樂組　

場地：柏斯琴行