岑麗香揀緊筍盤享受約會

人稱「香香公主」的岑麗香於無綫劇《樓奴》中，飾演返港置業的「竹升妹」，現實中也是溫哥華回流的她，見近年香港樓市飆升亦驚呼「好得人驚」，故一直儲錢買磚頭的她計劃於外國做「包租婆」、香港做「奴隸」：「由細到大，父母教儲到錢就買樓，買樓係安全嘅投資，想家人同將來安穩舒服，屋係最好嘅選擇。」

她又直言獲朋友落力介紹「筍盤」：「我都享受Dating嘅過程。（有約會？）我覺得要囉，係人生要做嘅。（有人追？）了解中，呢啲都要時間。」問到對象是圈內或圈外人？她答：「兩者都有好處，圈內人了解呢行嘅辛苦，同圈外人一齊嘅時候，可以幫我抽離呢個圈。」

岑麗香享受約會過程，目前正與追求者互相了解中。	香香試過遺失鑽石頸鏈，非常肉痛。	岑麗香主演的《樓奴》正熱播，現實生活中她也大嘆要做奴隸。

讚高海寧首席咪神

提到一眾無綫「咪神」人氣急升，張秀文、陳婉衡、歐陽巧瑩等先後彈出，身為「女神」的香香笑道：「梗係高Ling（高海寧）第一啦！」擔心「神級」地位動搖？專注拍劇的她主sell內涵，又笑謂無懼粉絲過檔：「當然有fans係好開心，如果佢哋淨係鍾意我身體一部分，咁我要檢討下！希望自己努力磨練演技，大家見到我啲戲有成長，而唔係某部分嘅高低。」

另外，香香昨日出席首飾品牌活動時自嘲是「大頭蝦」：「我成日跌o架，所以拍嘅時會除晒啲首飾放喺袋度。最貴係唔見咗兩條十字架鑽石頸鏈，夾埋係萬幾蚊，好肉痛。依家開工都會戴假嘢，真嘅留番喺屋企戴或者出街先戴。」

服裝：TOPSHOP

文：影視組　

攝：林蔚恩