雨僑搵命博危站棚架2粒鐘

雨僑一向給人性感、嬌滴滴的感覺，今次在新片《猛龍特囧》中就180度改變，飾演打扮騎呢的千度遠視盲妹，絕對是醜角，雨僑直言拍攝多個月來都要戴上千度遠視鏡而令她頭暈作嘔，為了分散注意力，只好將目光放空，在拍攝前記好走位步數，後來發覺事前吃暈浪丸有不錯效果。

缺乏安全措施

談到最深刻的印象，雨僑表示是在上海拍攝一星期的綁架戲，要在八樓高且無綁安全帶的棚架外站兩個小時，而地面更冇任何安全措施，她說：「我仲要着圓底鞋，冇辦法企得穩，嗰一刻真係驚到喊，第一次覺得做得唔好真係會死，我喊住同胡耀輝講你真係要捉實我！」

雨僑不介意扮醜，只求拍好戲。

雨僑戴上千度遠視鏡拍戲，搞到她頭暈作嘔。

男友支持接拍

在片中扮醜、又要喊，更要與格鬥高手楊建平打，雨僑就覺得拍攝《猛》片滿足感大，認為拍喜劇可以令人開心，至於男友羅力威有否給予支持？她避重就輕表示所有人都支持，拍拖多年的他們可有想過結婚？她說：「每段關係都要向呢個方向諗，但唔會係呢幾年嘅事，我想結婚但依家無欲無求，想把握工作機會，到第時結婚生仔可以無憂咁安胎，好似官恩娜咁，佢真係好開心咁期待小生命來臨。」

髮型：Vincent Lau@Private I

化妝：雨僑@www.avaliu.com

上衣：Kwak Hyun Joo from Duier

裙款：BIG PARK from Duier

場地：銅鑼灣利景酒店

文：影視組