楊怡體貼男友 生日拒收樓
八月三十日生日的楊怡，昨在活動中表示當日雖然不用工作，惟男友羅仲謙卻身在台灣開工未能一齊慶祝，更稱拒絕收樓做禮物！而張繼聰亦被爆拍攝時常在女同事面前甩褲，但他最難忘的反而是拍到腳震兼抽筋：「有好多唔同嘅虧！」
藝人楊怡、張繼聰、林夏薇、楊明等昨日到上環出席無綫新劇《收規華》宣傳活動，席間大會更非常有心思，向本月三十日生日的楊怡送上蛋糕提早慶祝，楊怡笑言都忘記了生日將至。原來過往的生日她多在工作中度過，亦冇特別慶祝活動，今年則希望新、舊曆生日都與媽咪慶祝，冇預男友羅仲謙，她說：「佢喺台灣拍緊嘢，（送驚喜？）我唔受得住喎！不過我諗佢都會畀個訊息我嘅！」又直言不希望收樓作為禮物：「依家唔係入市好時機！」認真知慳識儉！
難忘凍到腳震震
而《收》劇男主角張繼聰在活動中被爆拍攝期間常在女同事面前甩褲，他即時笑着回應：「支槍太勁，成日走火！」就連楊怡都大爆他拍攝時長期「火車未到站」！不過繼聰笑言其中最難忘的是拍攝時需抵受寒冷天氣和雨水，說：「得兩、三度仲要全日淋雨，真係凍到腳震抽晒筋！」又指劇中稱號「收規華」是收賄的意思，笑言「收規華」一詞很有發揮空間：「可以變做『收視華』，亦有好多唔同虧（規）。」
林夏薇分批請客
而剛為人妻的林夏薇則承諾會陸續安排同劇成員食飯慶祝新婚，惟不設防「造人」就要先待宣傳活動完結，更稱自己不會婚後減產，繼續努力工作，大讚老公支持自己，而她拍咀戲都會與丈夫一齊睇，說：「佢會好認真咁睇！仲會有意見畀到我。」
文：影視組