黎燕珊大女「索」甩男仔頭

近年娛圈新人乏善可陳，星二代頓成搶手貨！繼早前名模馬詩慧女兒王麗嘉及藝人林俊賢女兒林鈺洧殺入模界、上山詩鈉女兒Hilary甜美亮相後，昨日前亞姐黎燕珊的長女劉詠詩（Wynce）亦粉墨登場，與藝人龔慈恩的15歲囡囡林愷鈴一同為日本潮店行騷，各有千秋！

靚空姐名花有主

21歲的Wynce跟媽媽母女檔行天橋，由於首次公開表演，表現難免有點緊張，但憑着遺傳母親的標致外表及好身材已夠煞食，最難得是Wynce女大「三十六」變，由讀書時的男仔頭，蛻變成長髮披肩、成熟可人的美少女，令人眼前一亮！Wynce透露6歲時曾與母親一同行騷，事隔15年後再次亮相，問她是否想入行？她說：「我冇想過入行，我依家做緊空姐，係我由細到大嘅夢想，不過覺得今次係一個好好嘅新嘗試，又可以同媽媽一齊，同想藉此update依家嘅自己。」在旁的黎燕珊補充說：「佢話上網打『黎燕珊』，就出咗佢嘅相，全部係肥妹仔同男仔頭嘅相，所以好想update吓自己。」

劉詠詩樣靚身材好，相信不乏裙下之臣。（劉詩詠舊facebook截圖）	劉詠詩攬着巴斯光年，童心未泯。（劉詩詠舊facebook截圖）	劉詠詩4年前還是個男仔頭。

對於近期星二代湧現，黎燕珊表示亦有留意，她也鼓勵囡囡可多作嘗試，更有朋友拿選美表格給女兒，但Wynce興趣不大，星媽續說：「佢身材好好，應有嘅地方就有，試衫時啲人都話唔選美嘥晒，我覺得女為悅己者容，靚嘅嘢應該要同人分享。」對於是日囡囡的表現，她大讚200滿分。Wynce又自爆現在有拍拖，是否已見家長？黎燕珊即笑言：「有見過，好熟嘅，不過朋友啫，我同佢講應該要多啲選擇。」

龔慈恩的15歲囡囡林愷鈴獨自行騷，已甚有風範。

放大圖片

龔慈恩女愛唱歌

而同場15歲的林愷鈴（Ashley）就獨自現身，她表示沒媽媽龔慈恩在旁，感到特別緊張，但由於早前已面對過傳媒，故身材高挑的她表現比Wynce淡定。對於跟同為星二代的Wynce同場較量？她笑說：「我冇咁諗，唔介意，冇壓力。（你對呢行有冇興趣？）我依家仲係學習階段，我學緊建築、音樂，未知邊樣嘢會繼續行落去，我都好鍾意唱歌，最鍾意聽王若琳同鄧紫棋。（想做歌手？）鍾意音樂同做歌手又唔同，我跳舞一般，個人好硬。」這些甜美可人的星二代出現，的確令娛圈多一點生氣！

文：名人組