碧咸湊夏柏樂園飛車
近期與老婆Victoria驚傳婚變的「萬人迷」碧咸（David Beckham）前日全家總動員到迪士尼樂園享天倫樂，以行動闢謠，不過風頭完全被年僅4歲就淡定玩過山車的夏柏舒芬（Harper Seven）搶過！
碧咸與Victoria大前日懶理離婚傳聞，一家六口外出為大仔布魯克林（Brooklyn）慶祝考試成功後，前日再出動晒溫情！兩公婆帶4仔女與好友一家現身加州迪士尼樂園，樂做湊仔公的碧咸又孭袋又推住夏柏，雖與拖實二仔羅密歐（Romeo）的Victoria未有親密交集，但兩公婆不時肩並肩同行，又輪流推BB車，默契十足。
聽話同公主影相
而人氣爆燈的夏柏就繼續賣萌搶鏡，着上白裙的她雖乖乖坐於BB車，但不時動作多多，一時玩公主公仔，一時又用外套冚實自己扮失蹤，可愛到爆！而最搶眼就莫過於剛夠高度（102cm）玩過山車的她人仔細細完全膽生毛，過山車跌落水時仲笑得相當燦爛，比後座chok爆的布魯克林及high到舉手的羅密歐更盡興！
碧咸坐觀光船時又被拍到冧爆咀愛女的手臂，同日更大晒受夏柏指示，與《魔雪奇緣》（Frozen）兩位公主影合照，場面搞笑。而他亦於日前紮辮騎電單車與細仔告斯（Cruz）玩遊戲，湊4仔女完全唔偏心，至於Victoria就僅晒巡遊相玩低調，未夠日前分享碧咸攬實愛女的溫馨背影照咁吸睛！
文：外娛組