基仔設計婚紗幫老婆遮肥肉
古巨基和陳慧琳（Kelly）昨日出席「美心月餅×:CHOCOOLATE×小克環保月餅禮盒活動」，兩人同樣喜事重重，Kelly坦言個唱加場最想帶寶貝仔上台玩，而基仔十一月擺喜宴，不介意為太太設計性感婚紗，但笑言亦要幫老婆遮肥肉，並揚言「冇偷懶」勤力造人。
基仔和Kelly為環保月餅禮盒宣傳，基仔更正式宣布「11.11」補擺喜宴，問到可會有接新娘同兄弟姊妹團？基仔謂：「冇呢個設計，我哋都想簡單啲，所以係酒會形式。（咪冇兄弟幫你頂酒？）我自己都得，冇酒量唔好嚟呢個婚宴……講笑啫！」
問到可會再影新一輯婚紗相？基仔坦言：「上年影完嗰輯後，都有同古太講辦喜酒時不如影多輯，但古太『發展』到今天肥咗唔少，佢自己每日照鏡講話肥咗好多。（有咗？）未！能唔能夠影多輯就要睇佢減唔減到，我會幫佢設計套婚紗，要幫佢遮住肥咗嘅肉。」但基仔不嫌太太肥，還大講冧爆宣言說：「肥唔重要，我對佢嘅愛不在於外表。」
一直努力造人
婚紗設計可會給古太性感騷事業線？基仔笑言：「我咪佢條事業線囉！性感我冇所謂，我抱開放態度，係我怕佢唔制啫，只有我有眼福。」問到擺完喜宴是否就全力造人？基仔坦言：「都積極冇偷懶嘅。（古太有冇陪你周圍走去做嘢？）有時佢都會留喺香港，唔想佢太頻撲。（你一返嚟香港就努力？）你明就好啦，順其自然啦。」基仔稱這幾個月都好忙，十月於深圳舉行巡唱、十一月就辦婚宴，他笑謂：「之後仲會被大家追問有冇做到腳震震添。」
Kelly怕仔喊
至於Kelly則開心表示演唱會加場正式開賣，問到她可知銷情？Kelly謂：「趕住呢個活動冇問呀，唔夠咪再加囉，我預咗同大家過聖誕。」今次是Kelly產後首個個唱，可安排兩兒子上舞台？Kelly坦言：「我梗係想啦，但我怕佢哋喊喎！同埋都要煲啲提神飲品畀兩個仔，怕演唱會太夜佢哋捱唔到眼瞓。」
文：音樂組