周秀娜跪低傷膝痛到變臉
藝人周秀娜（Chrissie）前晚拍攝電影的追逐戲時因表現過度投入，而不慎當場仆倒致雙膝跪地。美腿受創的Chrissie其後出發睇中醫，她於包紮傷口時更痛到臉容扭曲！
無論做生意或拍電影都相當拼搏的周秀娜（Chrissie），於前晚拍攝電影《大樂師‧為愛配樂》的追逐戲時，不慎仆倒致雙膝跪地。雖然現場工作人員見狀即扶起她及急忙清潔傷口，但「整花」美腿的Chrissie於休息過後仍然痛得行路一拐一拐。但她仍堅持至拍攝結束才去睇中醫，而骨科醫師為其膝頭及左腳腕包紮傷口時，強忍痛楚的Chrissie一度痛至閉眼兼臉容扭曲，認真陰公，令粉絲心疼！
傷及韌帶舊患
其後Chrissie自爆因表現緊張及過度投入拍攝而仆倒：「因為拍嗰場戲有追逐戲份，比較緊張，自己又投入得滯！加上條路少少斜，同埋對鞋嘅鞋底都跣，唔係跑步鞋。咁變咗自己想收嘅時候收唔切，落斜衝力太勁，隻腳扭一扭就整親。」她又自嘲「論盡」受傷令其韌帶舊患再度受創：「我膝頭跪咗喺地下，傷到韌帶舊患。今次自己都係論盡同唔小心，下次小心啲啦！我睇咗醫生，唔算好嚴重。我啲骨冇事，係整親啲筋同腳腕位韌帶。」
文：影視組