王菀之蝕讓豪宅獲雪中送飯
歌手王菀之（Ivana）與音樂人馮翰銘（Alex）昨日到電台宣傳音樂會，被封為「樂壇神鵰俠侶」的他們表示今次將與香港管弦樂團近八十名樂手合作。對於海報上Ivana戴着花串頭紗，問屆時可會有「喜事」宣布？她笑說：「唔會有好消息喺當晚宣布啦，以音樂為主，其實有花係因為今次講『音樂芬芳』，刺激大家嘅觀感。」
兩位「彈」得之人Ivana及Alex透露將在台上比試琴技：「唔可以話係Battle，係鋼琴上合作，要苦練，保持最佳狀態。」有指Ivana蝕讓灣仔豪宅單位，帳面不見200萬元，她說：「唔講私人事啦，唔回應呢啲。」在旁的Alex即刻雪中送「飯」：「真（口架）？我保證佢嚟Studio會請佢食飯，無論佢係賺定蝕都好。」