藝人吳啟華、蔡思貝、滕麗名(阿滕)以及李施嬅(原名:李詩韻)等昨日在將軍澳電視城,出席無綫新劇《純熟意外》開鏡拜神儀式。啟華今次為劇集犧牲了不少與囡囡相處的時間,事關囡囡現時正在長春預備於九月份開學,需留港開工的啟華說:「佢之前都去咗日本玩,同埋九月開學之前,佢都有好多預備班要讀,學好多嘢,又鋼琴又跳舞。」
無懼父女關係差
已為《純》劇開工數天的思貝,則大讚主力對手啟華無論戲裏戲外都很有紳士風度,更笑言合演時感到尷尬,思貝說:「因為佢係前輩嘛。(NG多?)又冇喎,因為暫時都仲係拍啲怕怕醜醜,唔使特別去演。」思貝更透露劇中與啟華關係曖昧,惟未知有否親熱戲份。
滕麗名舒服賺錢
而阿滕則笑言今次劇集拍得輕鬆,在劇中專責調查欺騙保險案件的她,笑言自己廠景多又不需開槍、飛車:「本身我仲買咗幾把充電風扇仔留嚟外景用,依家可以送畀有需要嘅人!我都係第一次咁,好似套劇純粹幫我賺錢咁!」
文:影視組