杜德偉搞爛gag 擺阿媽上台

歌手杜德偉（Alex）、曹格、品冠與阿牛（陳慶祥）前晚現身澳門百老匯，合體舉行「男聲MPOWER力量」演唱會。一開始先由阿牛打頭陣獻唱《浪花一朵朵》揭開序幕，惹來全場觀眾歡呼尖叫。其後到以西裝Look上台的品冠大打親民牌，邊唱邊走到台下與歌迷握手，期間有歌迷要求集郵他亦全無托手(月爭)，還在台上自誇高大有型，大唱情歌冧歌迷。

曹格呻比賽不公

曹格則以一身黑白花花造型登場，還邀請囝囝Joe上台手拖手，Joe亦不時賣萌打招呼。其後曹格提到去年參加內地歌唱比賽節目《我是歌手2》首輪被淘汰，他直言：「係咪公平？我唔知喇！其實係公平嘅，我返屋企有諗吓，自己一定有問題，領悟到一件事，就係每個人生出嚟都係冠軍！」

阿牛（左起）、品冠、曹格與杜德偉笑言組合名為「嗎啡幫」，因眾人來自馬來西亞及菲律賓。	曹格攬實囝囝Joe打招呼。	阿牛打頭陣放笑彈惹來觀眾歡呼。

而壓軸登場的Alex，唱出招牌金曲《脫掉》時卻只脫掉外套，未有如早前紅館騷般脫剩內褲，幸而一輪勁歌熱舞帶動全場氣氛。四子同台時，Alex笑言組合名為「嗎啡幫」，因大家來自馬來西亞及菲律賓，他又搞gag謂：「去馬來西亞做嘢有好多人同我講『射你阿媽大燈』，我都唔明點解要『射你阿媽個大燈』！」阿牛即解釋是「歡迎你到來」的意思，Alex還叫全場觀眾一起大叫「射你阿媽大燈」。四子最後合唱《愛她沒得救》為演唱會劃上完美句號。

阿牛自嘲似快餐

四子受訪時，談到可以四人組合形式表演，阿牛即笑言：「我哋好似快餐店嘅套餐，四個會平啲！」問到Alex為何不脫掉衣服？在旁的曹格即話Alex要脫到70歲，Alex笑言：「63歲試吓水溫先，到時唔知有冇人想睇！」至於工作方面，品冠與曹格透露將於9月出新專輯，而阿牛就會接拍新電影。