高海寧愛書生 張曦雯冧粗男
高海寧（高Ling）與張曦雯（Kelly）的形象一個性感，一個典雅，擇偶條件也各走極端，高Ling喜歡有才華書卷味的男生，Kelly則愛粗獷型的大男人，兩人口味絕對不會有競爭。雖然兩位女神口味大不同，但卻同樣冧愛妻號劉青雲，視為心目中的「男神」。
高：高海寧
張：張曦雯
心中男神齊揀劉青雲
高：同Kelly幾有緣分，佢選華姐時我喺電視睇都揀佢係冠軍，佢入行第一個節目就係同我合作，嗰次第一次見就由朝對到晚，我健談，佢份人又好爽，所以乜都傾。
張：一開始同高Ling就好多嘢傾，感覺好舒服，乜都可以講，自己初入行對公司嘢唔係好識，又唔係好識人，會問吓高Ling公司嘅工作情況，佢好好人，好樂意幫我，所以有咩難題就搵佢。
高：我哋私底下都有約出嚟食飯、飲嘢，當然有講吓男仔，你鍾意啲咩男仔呢？
張：原來大家鍾意嘅類型好唔同，我鍾意Man啲、粗獷運動型、有陽光氣息嘅男仔，同佢完全掉轉。
高：我就鍾意斯斯文文、乾乾淨淨，唔好咁大隻，有才華識寫嘢就仲好。但係最緊要鍾意留喺屋企，因為我唔係咁鍾意出街，所以都希望另一半黐家，一齊煮飯仔、睇吓碟、或者傾偈，我係好鍾意傾偈嘅人。
張：所以無論性格同外形我哋鍾意嘅都好唔同，唔會爭男仔。
高：唯一有一個我哋共同都鍾意嘅就係劉青雲，雖然佢黑黑實實，但佢性格係我鍾意嘅，佢同郭藹明結咗婚咁多年，兩個生活都咁低調，青雲做戲又叻、又錫老婆、又冇緋聞，之前睇金像獎聽見佢同老婆講嘅宇宙論，真係好感動，真係男神呀。
張：青雲外形都係我好鍾意嘅類型，有啲滄桑、好有男人味。我需要一個大男人，因為自己揸唔到主意。
高：我鍾意啲成熟男人，唔係話要大我好多，係要思想成熟，唔係淨係識得帶我去邊度玩，要諗得長遠啲，好似前途、關係、將來，唔係依家開心就得，我係會考慮好多好多嘢嘅人。
張：我同你諗法都似，以前分手都係因為呢樣嘢，唔可以玩玩吓，呢刻開心就得，自己會諗到好長遠，雖然依家未想結婚，但拍拖嘅最終目標就係諗結婚，所以大家諗法唔啱就唔好勉強。
冇可能改變男人性格
高：我諗我結婚會早過你，因為我大過你，哈哈。唔知點解都單身咗咁多年，今年突然間有呢個感覺，過生日又大一歲就好驚，唔係話結婚，都要拍吓拖。
張：最衰我身邊啲男仔都好wild唔適合你，我會篩選過先介紹畀你，唔會介紹壞男人畀你。
高：我偏向理智嘅，唔會被口甜舌滑嘅男人氹到，愈誇大講自己有幾好反而覺得佢唔夠沉穩，扮晒嘢，真係叻人哋係睇到，唔係靠自己把口講，所以冇畀男人hurt過。
張：呢類男仔係吸引嘅，自己比較靜、踏實，都試過畀呢啲男仔吸引，覺得好有趣好有神秘感，想知佢諗乜，想改變佢令佢安定落嚟，但實際係冇辦法改變，而且只係開頭吸引，好快就頂唔順。
高：呢樣我又比你早少少發現，冇諗過想改變一個男人，性格係改唔到，所以見到呢種男仔就知唔啱我，我係咪太清醒？拍拖都唔係急就有，啱啱又完成咗人生其中一個夢想買樓，都要努力搵多幾年錢，唔係點供呀。
後記：終於等到「上車」
高Ling講到終於償願做業主就雀躍，儲錢七年的她，最近購入油塘一個新樓盤單位，其實她一直心大心細，她說：「自己一向想買三房，希望可以一家人一齊住，但係樓價實在升得太快，當我儲到首期樓價又已經升咗，今次買樓都要改變下自己觀念，改為買自己負擔得起嘅兩房單位，一來可以冇咁大供樓壓力，等咗咁耐最緊要係上咗車先。」
張曦雯：
髮型：Echo Wan@Headquarters
化妝：Leo@Annie G
採訪：影視組
攝影：張福宏
場地：King Ludwig德國餐廳（銅鑼灣）
服裝：iBlues