邱美薇小鳥依人搵家輝保護
「索版紙巾妹」邱美薇（Chelffy）憑紙巾廣告彈出，「爭仔」形象深入民心。雖然現實中Chelffy仍單身，但工作上卻艷福無邊。先後與影帝張家輝及視帝陳豪拍廣告的她，更直言從此鍾情大隻型男。
「索版紙巾妹」邱美薇（Chelffy）因拍紙巾廣告「爭仔」兼講對白「溫柔啲好」而聲名大噪，現實中的她既學泰拳又識芭蕾舞，名副其實剛柔並濟，故無論是弱質纖纖或活力十足的角色都難不到她。Chelffy表示最難忘是早前在舞台劇中，演比實際年齡大20年的妓女姨姨。
孖陳豪互餵蛋糕
Chelffy雖然仍單身，但工作上卻艷福無邊。曾與影帝張家輝及視帝陳豪拍廣告的她，因而改變擇偶條件：「同家輝拍廣告我硬晒軚，唔敢望佢，好驚電親，而且係我第一個拍嘅廣告。與陳豪合作時互餵蛋糕，佢都有教我，大家都好專業。（揀家輝定陳豪嘅類型做男友？）兩位都係爸爸同錫老婆，家輝拍《激戰》咁大隻，梗係要揀大隻保護到我，我可以小鳥依人啦。」
深藏不露靠媽咪
擁有33B的Chelffy「禾稈冚珍珠」深藏不露，她表示遺傳媽咪驕人身材：「媽咪有36，6年級嗰陣佢見我有少少變化，就怕我會好似佢咁大，但因我有跳舞做運動就拉長番自己。我覺得身材比例平均，唔使咁大，着衫會唔靚。（接受全裸演出？）接受到比堅尼。」
文：名人組