胡定欣阿田演技爆燈
由視后田蕊妮、胡定欣及陳豪孭飛的無綫新劇《鬼同你ＯＴ》開播以來口碑不俗，日前播出的第四集中，阿田及定欣上演一幕見工戲，以一致對白兼同樣動作，加上表情也一模一樣，盡現默契，令觀眾看得拍爛手掌，《東網巨星》facebook更有萬人畀Like！網友讚兩女展現神級演技，絕對是年尾視后之爭作品，升呢的定欣名副其實狙擊視后阿田！
上周一接棒劇集《武則天》播出的新劇《鬼同你OT》，雖然受着前者好評壓力下出街，但結果首播收視高開，平均錄得27點，比《武》劇首集平均收視高出一個收視點，可謂贏下漂亮一仗，加上《鬼》劇大玩人鬼情緣，並注入喜劇元素，三位主角均攞過視帝、視后及最佳女配角，絕對「戲味」十足，結果播出僅一周已成為網民熱話。
狙擊爭視后
剛周四（16日）播出的第四集，講述定欣飾演的鬼魂「姜蓉」，指示阿田飾演的「孫淑梅」突襲見工，應徵姜蓉生前的設計部行政經理一職，過程間阿田與定欣於同一時間講同一句對白，動作表情一致，當中一幕阿田面對馬蹄露飾演的尖酸刻薄HR「馬美貞」時，其鵪鶉性格隨即原形畢露，被對方兇得不敢抬頭，定欣見狀即時幫拖，開口冇耐便與阿田撻着「同步mode」，於約一分鐘時間，兩人如複製人般一take過「數白欖」豪氣講出數百字對白，兼且動作、眼神及角度也配合得相當完美，令觀眾看得拍爛手掌，網上隨即引來討論，《東網巨星》facebook更有過萬網民畀Like，網友大讚兩人展現神級演技，絕對有力於年尾的台慶頒獎禮拗手瓜。
對於被網民喪讚，阿田昨接受電話訪問時興奮非常，不諱言沒想過觀眾反應如此熱烈，更指當初接到該劇本時已覺難度高，心想定必拍不出要求，她謂：「開廠第一個星期就排呢場戲，大家第一次合作，所以第一次排係各自做緊自己嘢，完全唔係嗰回事，感覺好失敗，之後導演叫再試多個，我哋就夾埋動作試好啲，到第三次排又好似幾好，跟住第四次就正式拍，又畀我哋做到，拍完後覺得好似玩遊戲機打贏大佬咁，在場嘅人都睇到拍晒手掌，話我哋好似twins咁，亦因為咁令我哋之後嘅戲更有默契。」談到兩人被睇好年尾爭視后，定欣更狙擊她，阿田哈哈大笑謂：「依家先7月中，言之尚早，觀眾睇完就會忘記，咁搞法，真係要『姜蓉』上身先搞得掂喎！」
監製讚專業
該劇監製徐正康對於網民反應好，亦說：「梗係開心，拍嗰時我唔在場，但知阿田話好驚，感受到佢有壓力，但最後都好專業完成，其實呢啲場口唔只一場，之後都仲有。（睇好邊個拎視后？）兩個都好好，阿田角色易攞分，變化大，不過扮鬼嗰個（定欣）都唔易o架。」定欣則於截稿前還未聯絡上。
文：影視組