陳柏宇出專輯 「回眸」音樂路
歌手陳柏宇（Jason）入行8年，上月再推出新專輯，希望帶給歌迷似曾相識的感覺。快將32歲的他，除在音樂路上繼續平穩發展外，在私人生活上亦有意邁進人生另一階段，揚言要生育下一代的他早對教養孩子亦有一套獨到見解！
陳柏宇（Jason）上月中推出新專輯《Escape》，坦言想帶「似曾相識」的感覺予歌迷：「過往都試過唔同曲風，但無奈大家對於我唱一啲另類音樂時嘅接受能力唔高，所以今次都花咗好多時間揀歌。最終揀咗一啲timeless嘅歌，好似《回眸一笑》同《別來無恙》都係大家熟悉嘅曲風。」
唔心急開騷
新專輯中不乏高難度歌曲，對Jason而言最難的一首是《親愛的仇人》，而有plug的《別來無恙》，則排在新碟11首歌中的第9首，Jason指這個特別編排是音樂總監Edward的心思，希望營造睇show一樣的氣氛。入行8年，Jason從未擔心成績及與人比較：「最重要唔係用自己同人比，而係點令自己更進步。我亦唔心急上大舞台開騷，一日唱緊歌我都相信自己有機會。」
怕教百厭仔
Jason又希望在年內達成在公開場合自彈自唱目標。個人感情方面，他亦有目標在兩年內成家立室，坦言與女朋友已發展到談婚論嫁的階段，亦有意生B：「如果第一個生女就可以追多個，但第一個生仔就唔好再追喇！我哋兩個性格都百厭，擔心兩個咁啱都係仔嘅時候會駕馭唔到，一女一男、兩個女都得，如果唔係一個仔就夠！」他更透露對教細路有研究，更曾在加拿大修讀相關科目：「我自己唔會chur個小朋友，唔係同人競爭而係自己發揮潛能，幫佢做到佢嘅最好！」
文：陳丹
攝：榮