梁漢文另組男人幫 歌影視發圍
事隔三年，梁漢文（Edmond）預告將「空降」紅館，更會孖住新拍檔蘇永康、任賢齊和黃家強組成「男人幫」踏上舞台試水溫。他透露與四位兄弟密謀大計，在下半年着手擴展「國語歌」版圖！
梁漢文將於八月中再度在紅館舉行《梁漢文紅館中場表演2015》，他透露今次只開三面台，更破天荒想以降落傘「空降」紅館，笑言：「係太太之前提出，其實都幾難做到，但佢講咗出嚟我哋就開始諗做唔做到呢？如果做就一定擺係Opening，同Dancers（舞蹈員）一齊跳落嚟！」講到高空表演有一定危險，Edmond就話自己有豐富的「高空工作經驗」，曾在10尺高的鐵架上跳下來讓舞蹈員接住：「做呢啲之前要盡量檢查好，呢啲公司都會幫我買定保險。」
神秘女伴奏
Edmond指今次會繼續承接過去的演唱會，在其中一Part除了化身成鋼琴王子大晒琴技外，亦請來兩位女嘉賓伴奏：「佢哋會四手聯彈，係邊個要保守秘密，不過可預告一個係少同我合作，但大家會多見到佢彈琴，另一個就啱啱好相反。」
擦出新火花
問到Edmond可會請好兄弟蘇永康（阿公）、許志安和張衞健組成的「BIG FOUR」上台做嘉賓？他透露今次會換換口味，請來同樣有阿公助陣，再加上任賢齊（小齊）及黃家強的「男人幫」撐場：「今年同阿公簽咗小齊間公司，年頭一齊喺雲頂開騷，個反應好好，四個唔同風格擦出咗新火花，但就一直未有平台再合作。」他表示新EP即將在七月中推出，同期會與男人幫飛到台灣拍MV：「嚟緊同男人幫會係不同方面發展，好似電影、電視劇等等。」
文：音樂組
攝：張福宏
化妝：Maggie Lee
髮型：Moe @ FIFTH
場地：紅磡都會海逸酒店