龐卓欣獲富爸科水 辭工撼麥明詩
12位候選港姐昨日正式曝光，焦點始終離不開一對由小學鬥到選美的「宿敵」A麥明詩及D龐卓欣身上，「十優狀元」麥明詩贏在樣貌標致兼有高學歷；而有父親無限量財力支持的龐卓欣則辭工瞓身迎戰，兩人可謂有排鬥！
《2015香港小姐競選》12位成功通過三輪面試的「終極」佳麗昨日首度正式見傳媒。劍橋法律系畢業的「十優狀元」麥明詩（Louisa）學歷贏晒，問她可會視龐卓欣（Ada）為大敵？麥明詩說：「唔會，大家互相激勵，依家好難講邊個最有競爭力，小學、中學都係同一間學校，大家背景相似先攞我哋比較。（同Ada熟唔熟？）好可惜青春期唔係一齊度過。（Ada寸嘴？）佢唔係寸，係性格獨立啫。（點解選港姐﹖）以前係書獃子，成長咗想擴闊視野。（壓力大消瘦﹖）開頭有壓力瞓得唔好，朝早起身都會開app睇吓有冇自己新聞，依家適應咗。（外間話你贏梗？）都有壓力會大熱倒灶，要學識調節。」
自認牙尖嘴利
有「富爸爸」龐寶林經濟支持的龐卓欣透露近日已辭工瞓身選美，問與麥明詩可熟稔？她說：「依家開始friend，同佢係同學但冇話特別close，參選見到佢都好驚喜，同佢講你竟然都喺度呀。（同麥明詩再鬥過？）唔係，互相支持。（話你寸嘴？）自己唔覺係寸嘴，正面去睇可能代表我牙尖嘴利或者叫口才好。」
資助服裝費
Ada父親龐寶林接受電話訪問也認為麥明詩是愛女勁敵，坦言會在財政上無限量支持愛女，他說：「佢想買咩衫都會支持，以前佢表演啲服裝費仲貴過學費。Louisa讀書叻，Ada就自細表演慣，小六畢業禮已經做女主角用英文演出，要睇佢哋到時發揮。」G吳佩欣講到在社交網站晒泳衣相，她說：「只係放咗兩張，之前出海影嘅。」無綫高層余詠珊指佳麗稍後會到日本接受頂級排舞師及化妝師訓練，並會在當地電視台節目亮相。
港姐等你起底
爆料熱線：3600 1022
爆料傳真：3600 1000
爆料email：ent@on.cc
採訪：影視組