任達華打不死 挑Tony Jaa機
任達華、Tony Jaa等主演新片《殺破狼Ⅱ》成績斐然，台前幕後鐵定再開第3集。身在上海的他即向導演「獻媚」，自度角色挑戰吳京及Tony Jaa，繼續以「打不死」形象捲土重來。談到父親節獲愛女冧爆送禮又熊抱，任達華打趣說：「暫時連老婆都可以唔要！」
任達華、吳京及Tony Jaa等主演新片《殺破狼Ⅱ》氣勢如虹，在港累積票房超過500萬，內地上映4天更突破3億人民幣，台前幕後認真飲得杯落。據悉，身為監製的黃柏高對該系列電影甚有情意結，一直寄望開拍第3集，如今好消息傳來順理成章加快步伐開始籌拍，劇組更鐵定本月26日晚在港舉行慶功宴。
鄭保瑞稱得來不易
導演鄭保瑞透露《殺Ⅱ》拍攝過程經歷了「吳京受傷坐輪椅結婚」及「張晉打到放血」，今次成績絕對得來不易，令他心存感激。至於張晉則表示所有付出的血汗都已值回票價，不過由於開工關係，今年他未能與兩愛女慶祝父親節，難免有點遺憾。
而身在上海的任達華則表示要投入拍攝另一新片，故未能返港參加慶功宴，不過對開拍第3集非常支持，更自度角色挑戰吳京及Tony Jaa：「我覺得第3集自己要演一個退休警察，繼續打生打死，會同鄭保瑞傾吓。佢一直好聽我嘅意見，好似今次用攪拌機碎手嗰幕，都係我諗出嚟而佢又覺得OK。（幾時開工？）咁多嘢要準備，最快都兩年後啦。」
氹囡開心釣魚加餸
另外，任達華趁父親節，帶同開始放暑假的囡囡任晴佳同往上海，爭取相處時間，他昨早更親自到湖邊垂釣，帶幾條海上鮮返家與囡囡撐枱腳：「佢有新鮮魚食好開心，我都好開心，因為佢送盒禮物畀我，喺上面花盡心思畫咗好多公仔。昨晚佢攬住我瞓，搞到我意亂情迷，真係暫時連老婆都可以唔要。」
文：影視組