藝人陳自瑤（Yoyo）升格為人母後，愈做愈有幹勁，並未有退隱計劃。無論對自己或是老公王浩信亦信心十足的她，揚言要事業、家庭兩兼顧。面對娛圈種種流言蜚語，Yoyo則非常淡定，並指兩夫妻日日見，要講個「信」字！

藝人陳自瑤（Yoyo）自為人母後仍於電視劇中頻頻亮相，似乎未有當全職媽媽的計劃，問到誕下女兒王靖喬後，會否嚴選劇本類型，她即直言：「唔可以咁嘅，呢個係我哋嘅工作嚟o架嘛，咩角色我都會試嘅，我相信第時囡囡都會明白！（若遇到一些激情的戲份？）咁我都係拍劇啫，尺度都唔會好大，就算拍床戲都係錫吓就第二朝啦！」

提到婚姻生活，Yoyo即直言非常羨慕娛圈中的金童玉女，影帝劉青雲與其夫人郭藹明：「我自己本身都好鍾意郭藹明，覺得佢又靚又叻，婚姻生活都好美滿。」不過，Yoyo則拒絕「倣效」郭藹明做背後女人，揚言要事業、家庭兩兼顧：「我又唔會專登倣效，每對情侶都有佢哋相處嘅模式。相比之下，我更加想事業、家庭兩方面都兼顧到，老公都好支持我！」

問到Yoyo與老公之間有甚麼維繫感情的小貼士，她即稱：「兩個人一齊真係要多啲私人時間，尤其生咗小朋友之後更加需要啲二人世界，唔使吓吓都全家出動！」

提到王浩信緋聞不斷，她即笑稱：「咁講得係娛樂新聞，娛樂性都一定要豐富啲至得嘅，我都見怪不怪。佢幾時同邊個食飯，其實係畀人影到之前，佢已經話咗畀我知。（不會再過問？）咁我哋唔係好耐先見一次，佢幾忙都要返屋企瞓，日日都會見到o架嘛。」

文：鄧倩兒　

攝：劉智源　

場地：晉薈