克勤Joey聲戰紅館
樂壇天后容祖兒（Joey）、靚聲歌王李克勤排除唱片公司間的良性競爭，今年「911」首度攜手登上紅館舞台開騷。兩人將私下「Gathering」關係公開化，為保友情不會擘面，祖兒先旨聲明「有所謂」，克勤亦擺明不會客氣。兩巨星同台竟非「宇宙價」，全因二人是實實在在的地球人。
飯腳情緣煲足11年
李：克勤 容：祖兒
李：2004年「拉闊」音樂會當晚完騷，我講了句紅館見，點知呢條伏線就伏了11年！
容：有講咩？嘩！你準過盲公陳。
李：11年前我哋只係普通熟。
容：之前唔可以話係熟添呀！不過克勤比較主動識朋友，第一次去佢屋企食飯，佢同Emily（盧淑儀）準備了火鍋宴畀我食，好感動。始終佢哋有小朋友，習慣早食飯，當日等了我好耐，有啲唔好意思。跟住我哋個Gathering就愈來愈多人，圈子愈擴愈大，好似黃偉文、汪明荃，大家感情愈來愈揼得好實。
李：同埋阿龍（劉浩龍），哈哈！
背校長搵外遇jam歌
容：上年Gathering食飯，克勤問我有冇興趣一齊做騷？我覺得幾得意，自己又做了7次紅館騷，如果有啲新衝擊同人夾吓都好，就應承咗。
李：我成日覺得新火花來自同唔同人合作。（笑笑口）我見到校長（譚詠麟）都有外遇，搵杜麗莎開騷，講笑啫！其實我覺得係緣分，點解等到今年先做？我都唔知點解，總之講講吓食食吓飯，突然就話講咗咁耐，不如做啦。之後各自問老細，（暗笑）我哋唱片公司係冇我哋咁friend，始終有競爭性喺度，要排除一啲問題先可以合作，當然佢哋都睇好我哋個騷，所以過程唔難囉！
挑剔揀擇唔易反面
容：佢真係好挑剔、好揀擇，佢會藐人o架！
李：真係？（笑笑口）
容：克勤係畀我印象中更man的一個男人，佢心裏面係一個鐵漢的心，好照顧人。佢認定你係佢朋友的話，佢就義無反顧，如果唔係，佢就唔會理你，比較愛恨分明。
李：對唔熟的人，我會有禮貌啲、客氣啲，對祖兒就唔使咁客氣。
容：大家真係唔好太客氣，我有個習慣係冇所謂，但以往經驗所得，太客氣到頭來，最後可能忍唔住，遷就唔到咁多嘢，會推翻以前話冇所謂嘅嘢。咁不如一開始我有所謂先，咁個合作先會健康同唔會反面。
李：唔會反面呢樣嘢好緊要，因為兩個人做一個騷，難到不得了，同大家去玩係兩回事。因為係大家嘅事業，所以會好緊張，點樣先可以令到個食飯關係擺到落個騷度，其實係一個學問。因為我做過「左麟右李」，兩個人一定有一萬個唔同的地方、多到不得了的意見不合，真係好需要兩個人好錫對方，你先會好多嘢都唔介意，一介意有刺就做唔成，連唱多過你一個字都唔得。
容：呢啲真係有人計o架？
李：有o架，我聽過有人計，況且大家團隊又唔同。不過我同阿倫半次交都冇嗌過，暫時我哋都冇，都有信心……嘅（哈哈）。
容：我有信心，我都唔鍾意同人嗌交。
李：我哋都係嗰種好顧全大局的人。
容：有意見係好正常，我一定會攞出來講。
李：好多時只要大家直接去講，擺上枱就冇事，千祈唔好收收埋埋同估估吓。大家喺呢個圈做咗咁多年，一攤出來都明大家點行。
一個價錢睇兩巨星
李：歌酬一定少過一個人開騷，一筆錢係得咁多，我哋要兩個人分，點會多得過一個人的價？暫時Rundown裏面，絕大部分時間我哋都係同時出現，付出的體力同一個人做騷係冇分別。
容：其實做呢個騷歌酬幾多冇所謂！
李：（指住祖兒）佢話o架咋，我有所謂o架，有負擔同冇負擔嘅分別。
容：我哋應該賣貴啲飛。（貴飛賣$780）正！因為可以睇到兩個騷。
李：使唔使賣宇宙價？
容：唔使，量力而為。
李：我哋係地球人。兩人做騷事前預備工夫比較多，一定要理對方感受，要大家都覺得OK、舒服先行每一步。
後記：反敗為勝爆猛料
克勤踏實的外表，平日不多出聲，但每次訪問他都好清楚記者要乜，計得好準確，既幽默又到point，相反祖兒把嘴就「輸」咗。不過臨尾祖兒終於贏番次，大爆好友徐濠縈好鍾意克勤，她笑言：「佢偶像嚟o架，佢見到克勤會心跳、緊張，但見到Eason（陳奕迅）係唔會。」在旁的克勤哈哈笑，唔識回應。
文：音樂組
攝：劉智源
場地：尚品薈
化妝：Hubei Har
容祖兒服裝：Stella Jean@cocktail
髮型：Heibie Mok、Jacky Tsui@Hairculture