狄龍恤靚髮遲到見孫女
恭喜！恭喜！狄龍兒子譚俊彥昨日榮升爸爸，其妻誕下六磅六安士的囡囡譚晴，難掩興奮心情的他前晚未瞓過，又爆料指父親狄龍為恤靚髮而遲到。狄龍大談孫女經時，更開聲要求再抱男孫！
藝人譚俊彥昨日升呢做爸爸！今年1月2日奉子成婚的他，其妻昨日剖腹誕女，B女重六磅六安士，並取名譚晴，譚俊彥難掩興奮心情，表示前晚緊張得未有入睡：「拍戲就拍得多，入產房係第一次，真係好唔同。」
陪完太太再搏殺
全家熱切期待BB的來臨，不過身為爺爺的狄龍為了「扮靚仔」竟然遲到，譚俊彥說：「佢話要洗個髮先見孫女，結果BB出咗世，影晒相佢都未到！後來要BB等埋佢嚟先返入去！」他指爸爸「恨抱孫恨咗好耐」：「爸爸同我講，要養好身體，因為想將來同個孫女去旅行！」譚俊彥陪伴太太坐完月後，便要返回內地繼續搏殺賺奶粉錢。
開到口要「晴朗」
榮升「爺爺」的狄龍與「嫲嫲」陶敏明亦十分興奮，狄龍見孫女出世，令他回想起兒子出世時的點滴，猶如昨天發生一樣，狄龍見罷孫女後更首度開腔大談BB：「好靚女，依家追求生活自在，湊孫為樂，有個譚晴，我梗係想有多個『譚朗』啦，日日晴朗、晴朗咁！孫女就可以同佢扮吓靚，紮吓辮仔咁！」不過太太陶敏明就埋怨狄龍遲到，她說：「個個都到晒佢都未嚟，姑娘話BB凍喇，要入返去！」狄龍笑指要「恤個靚髮見孫女」。陶敏明又謂已收到不少朋友的祝賀，當中包括好友林青霞的短訊，青霞昨日更以視像電話與BB見面。
文：影視組