娜奧美屈絲華麗轉身

娜奧美屈絲

「呢條裙好適合行紅地氈，一身打扮性感高貴又夠晒隆重，加埋名貴閃爍嘅珠寶襯托，雍容華貴，佢着得好好睇、好搶眼，條裙修腰修得好靚，佢嘅一頭金髮襯銀灰色都係絕配。」

全智賢

「好穩陣嘅打扮，展現出韓國美女嘅氣質，條裙嘅顏色係佢咁白淨先着得好睇，黑色蝴蝶結腰帶令佢腰形更突出，亦令佢身形線條比例更加修長。」

Angelababy

「條裙有啲平凡，行紅地氈唔夠隆重，佢嘅髮型亦唔啱佢嘅年紀，紮起晒顯得有啲老氣，同條裙有少少格格不入，成個造型唔起眼又唔特別。」

綾瀨遙

「條裙其實ＯＫ靚，不過就係Cocktail dress款，唔係咁適合行紅地氈，相比之下有啲遜色，長度拖地嘅話會好啲。佢嘅髮型、化妝都比較普通，成個造型好平凡，一啲都唔突出，如果搽個紅嘴look，濃妝啲會跳脫啲。」

范冰冰

「條裙係靚嘅，成個造型好有仙女Feel，同佢本身個娃娃樣好襯，有種飄逸嘅氣質，不過頭上嘅花環就顯得有啲too much，除咗啲頭飾會清麗啲。」

查理絲花朗

「簡單嘅設計已經好靚、好吸睛，完全表現到咩叫做簡單就是美，大方得體，拖尾裙襬好grand，黃色裙走喺紅地氈上特別sharp，髮型、化妝都好match。」

李冰冰

「眼前一亮，超級靚，高貴優雅又帶少少性感，see through得嚟唔暴露，佢骨肉勻尸稱完全Carry到一字膊設計，對誇張嘅耳環亦襯得好靚，皮膚白襯裸粉色好好睇。」

茱莉安摩亞

「大方得體，好優雅又好耀眼，成個感覺好舒服，性感得嚟唔會覺得肉感，珠片裙好易顯得人肥，不過佢冇呢個問題，條裙嘅cutting令佢身形望落好修長。」

Profile

香港著名模特兒陳嘉容（Eunis），曾為各大國際品牌行時裝騷，在時裝界打滾多年，不論時裝的理論還是實戰都難不倒她，近年更為電視時裝節目擔任主持，化身stylist教人配襯衣着打扮。