Jeana當何浩文精神伴侶
刻下男與女的關係很難一語道破，有時甚至連當事人亦模糊不清！早前在首映禮上公然互咀的何佩瑜（Jeana）及何浩文（Dominic）「友達以上、戀人未滿」，彼此碰面有說不完的話，不過女方卻只視男方為「精神伴侶」，而男方雖明言事業行先，又未能一口咬定日後不會「改變」彼此關係……人生在世，凡事都可以有十萬個可能，做人絕對never say never！
何佩瑜：J 何浩文：D
食得唔嘥 魚樂無窮
D：其實我比你早一年入（經理人）公司，所以都算睇住你入行啦。
J：大大話話我哋都識咗5年，不過以前見面機會唔多，每次打聲招呼就走，直至去年大家合作拍戲，所以先愈走愈近變熟啫。
D：我記得大家第一日開工放飯，你竟然攞住個飯盒走埋嚟問我，想唔想share？當時同你又唔係好熟，點解要share呢？心諗呢個女仔都幾爆喎。
J：食唔晒嘛，我覺得做人要有衣食，唔想嘥嘢啫。
D：嘩嘩嘩！雖然以前同你唔熟，但都聽過你啲「戰績」，有人話我知你返內地做嘢叫消夜外賣，人哋十幾蚊一個餸，你可以一個人叫百幾二百蚊，仲食得晒喎。
J：依家年紀大咗，新陳代謝慢嘛，所以唔會再咁放肆，但聽講你都唔弱，可以一口氣食幾個麥噹噹餐喎。
D：我想講呢……其實我真係幾鍾意食嘢，之前為拍戲要我操弗，做運動操肌都唔覺辛苦，反而忍口就真係攞我命。靜雞雞話你知，有時凌晨肚餓我會衝落屋企樓下間茶餐廳蒸條倉魚食，想睇吓啲倉魚幾時會畀我食晒，哈哈！
J：係咪咁夾呀？我整消夜都唔會煮即食麵，有時打開雪櫃有咩整咩，試過半夜蒸魚食，我仲以為得我一個咁癲咋。
講電影 男有火 女瘋狂
D：講起又奇怪喎，我哋嘅話題通常只圍繞電影，反而冇乜傾過「食」。
J：弊就弊在我哋只係傾電影，一開口閒閒哋都可以講足幾粒鐘呢。記唔記得有次你上我屋企攞嘢畀我，我換衫等你嚟一齊落樓做gym，點知電視播緊奧斯卡，我哋兩個坐低邊睇邊傾，傾到乜嘢都唔記得晒。我好感恩，近呢兩年搵到自己人生嘅目標，就係電影嘞，好希望能夠keep住呢團火。
D：我對電影直情陷入瘋狂狀態啦，睇戲會留意埋人哋嘅鏡頭擺位、畫面同演員演繹方法，仲會對住塊鏡幻想如果由我嚟演，自己會畀咩表情。
J：你唔係見唔到呀？我直情搬咗半間影音店返屋企，啲電影影碟擺到一屋都係。好鍾意匿喺屋企煲碟，有時一口氣睇幾套劇情片，睇到自己情緒掹得好緊，影響晒自己心情，但又覺得好正。最近我就開始動筆學寫劇本，題材關於一對同性戀人嘅故事，內容涉及情殺及精神虐待，呢方面你都畀咗唔少意見我。
D：某程度上，我好欣賞你對自己工作嗰份熱忱，以及樂天性格。老實講，呢行有好多人其實唔係好鍾意自己嘅工作，亦唔係好清楚自己喺度做緊啲乜，只係覺得娛樂圈紅起上嚟，可以搵到好多錢，但你絕對唔係囉。
J：咁我對你印象夠唔差啦，覺得你好gentleman、健談同體貼，內外條件都好係女孩子心目中嗰杯茶。可能外界對我哋嘅關係有好多聯想，坦白講我視你為知己、soulmate（精神伴侶），真係未諗過其他嘢喎。
D：哎吔，慘食檸檬添，不過暫時嚟講我都想事業行先，拍戲、音樂最好樣樣有工開。我份人好衰，一投入工作就六親不認，呢種性格真係唔係幾啱談戀愛……但今日唔知聽日事，邊個敢講以後會點吖？
後記：爆女神常靈魂出竅
Dominic口中的Jeana，與平日女神形象大相逕庭！
當Jeana表示自覺新陳代謝開始減慢，Dominic加插一句：「咁又係，你都40嘞！」Jeana只得沒好氣回道：「我26咋，不過心境年年18！」
說着說着，Dominic大爆Jeana愛「靈魂出竅」﹕「同佢傾偈傾到興高采烈，突然會發現佢冇晒反應，你拍佢佢會問『你講乜話』？佢直頭將自己放空，跳晒線咁，真激氣！」Jeana腼腆承認：「有時我係忽然抽離嘅。」
得一如此知己，即使不談戀愛，相信Jeana亦大感窩心！
文：影視組
攝：吳文聰