謝賢粗口稱霸 曾江讚有音樂感

謝賢、曾江、胡楓及Joe Junior昨日為無綫節目《四個小生去旅行》遠赴俄羅斯取景，平日聲大大的謝賢，面對甚有氣勢的曾江，瞬間變了小綿羊，合照時又搞鬼地為曾江揼骨。

準備移民俄羅斯

說到要照顧新加入的曾江，Joe自言上次也負責照顧胡楓，謝賢則重提爆粗事件：「你照顧佢又害我講粗口？我今次唔會講。」語畢即被胡楓秒殺寸道：「係今次真係唔會講一句！」曾江亦搞笑撐謝賢：「你啲粗口幾好聽，有娛樂性又有音樂感。」

問謝賢會否看俄羅斯美女？他說：「依家對女人冇興趣！」胡楓即爆料說：「佢真係對女人冇興趣，依家係對一個咋！」曾江補充笑謂：「係一日一個！」見謝賢帶了四箱行李，胡楓又笑他準備移民俄羅斯。

曾江擺甫士任胡楓影。	胡楓（左起）、曾江、謝賢及Joe Junior玩互窒。	胡楓似乎樂於被曾江戲弄。

提到被指早前做「通波仔」手術，醫生不建議坐飛機遠行，謝賢打趣道：「我幾時有波畀人通，我有胸啫，冇波。（好耐之前『通波仔』？）冇事嘅，坐飛機有乜所謂。（接受太空人離心訓練？）唔知畀唔畀我哋玩，要驗身。」

胡楓笑鬧冇人性

腳患痛風數十年的曾江，被問到怕否行程太辛苦？他說：「唔行得咪唔行囉，講明唔得就唔得，佢要求我做唔到就最多盡力而為。」胡楓則表示不敢玩熱氣球和拖獅子老虎：「啲獅子老虎冇牙都仲可以考慮，有牙就唔好搞我，好似佢兩個（曾江、謝賢）咁冇人性，容乜易行行吓噬一啖。」

文：影視組