發哥神回覆夠頂癮 祖兒：記住睇我問啲咩？
在「神級影帝」周潤發登「六」的日子，《東網巨星》推出特備節目《我愛發哥》，邀來25位紅星向周潤發致敬。首周播出反應空前熱烈，踏入第二周，周潤發與一眾紅星隔空吹水，繼續金句連連！除藝人楊秀惠及譚耀文亦大讚內容吸引，連樂壇天后容祖兒亦有份發問，想知一眾紅星問啲咩，發哥又有咩「神」回覆，記住留意《東網》陸續推出的節目《我愛發哥》喇！
容祖兒：大家都知道《東網巨星》入面有好多我哋Artists朋友問發哥問題啦，其實呢……我都有份問o架，咁大家記住捕實《東網巨星》入面《我愛發哥》囉喎，睇吓我到時會問發哥咩問題啦！
楊秀惠：大家好，我係楊秀惠，有好介紹！《東網巨星》出咗個《我愛發哥》專題，大家上去就可以睇到發哥嘅妙問妙答，發哥！我愛你！
譚耀文：有筍嘢同大家推介！就係《東網巨星》嘅節目《我愛發哥》，有一班紅人紅星同發哥隔空對話，唔睇你哋就走寶啦！
第二周對答更爆趣
第六集：佘詩曼學瘦面 「秘」技
周潤發為拍戲體重成日變，向來愛靚嘅佘詩曼就問周潤發：「發哥拍戲有時要增肥同減肥，點解塊面仲咁Firm？」點知周潤發就發放笑彈咁覆阿佘：「我一唔聽話，老婆就兜巴摑埋嚟，摑完左面摑右面，你唔Firm就有鬼！」
第七集：鄭俊弘個心甜到漏
原來周潤發當正鄭俊弘係偶像，讚佢又勤力又乖，鄭俊弘話有次在銅鑼灣遇上周潤發，對方即時笑住同佢打招呼，個心不知幾甜，周潤發即「神」回覆：「我見到你個樣都甜啦！你阿媽見到你更加甜啦！」
第八集：鄧麗欣搞好婆媳關係
周潤發同發嫂咁多年都咁恩愛，聽到Stephy咁鍾意自己，即向與方力申蜜運中的鄧麗欣傳授夫妻相處之道，在於搞好婆媳關係，仲讚方力申執到寶：「我覺得小方同你一齊係佢嘅福氣，你睇吓佢珠圓玉潤。」鄧麗欣聽完後即爆笑話：「發哥都話你肥呀！」
第九集：許廷鏗要「襟撈」
許廷鏗係年輕人偶像，成日都有人搵佢影相，佢就問周潤發：「點解你咁願意同朋友自拍？」周潤發立即拋出「識撈」金句，袋錢落許廷鏗袋：「佢哋係我米飯班主，老細叫你影相你唔影？你唔襟撈啫！」
第十集：薛凱琪被讚夠癲
原來周潤發不嬲都欣賞薛凱琪，仲要鍾意到「癲」嗰隻，周潤發仲史無前例用一種方法鼓勵薛凱琪，佢話：「你鍾意唱歌又做戲，我鍾意！你癲起上嚟都幾癲o架！繼續向呢方面發展。」薛凱琪聽完偶像咁講，立即開心到癲！