許廷鏗要親和力 發哥：當7百萬人係親戚

Alfred：「點解你咁願意同其他朋友自拍，你覺得點樣可以增加親和力？抑或真係好鍾意同人影相呢？」

發哥：「某程度上，去到依家我呢個年齡，睇我嘅人分分鐘呢……我入行時17、18歲，睇我嘅人可能佢係o既仔，由電視、電影睇到呢個哥哥幾十年，有日喺街撞到，嘩！畀着我都會癲，如果唔同佢影番張相，係我嘅遺憾嚟喎！嗰個人支持咗我好耐，係米飯班主喎！電視就話唔收錢啫！如果佢套套戲都買飛睇我，我老細嚟喎！老細叫你影張相，你唔去影，咁你都唔襟撈啫！係咪？老細嬲咗你，唔買飛睇你，你咪死得？喂！我食咩飯？我食電影飯嘛！老細叫我影相我一定影，佢哋唔止係買飛嘛！對你感覺好嗰陣，會同朋友講呢條友唔錯o架！呢樣已經唔係錢可以買到啦！好重要呀親和力。」

被讚唱歌好聽

Alfred；「點解你面對鏡頭可以咁自如，咁自然呢？」

發哥：「由今日開始，你當身邊嘅人，同你做嘢嘅人好似屋企人咁，出到出面都係屋企人，香港有幾大啫！700萬人，你咪鍾意晒700萬人囉！你幾多親戚呀，有咁多傍住你，撐你！點會要你衰呢？係咪！呀鏗哥！許廷鏗吓話，你啲歌好好聽！」

形象親民的巨星發哥親解如何增加親和力，夠晒說服力，令Alfred茅塞頓開！他說：「首先好多謝發哥回應小弟嘅提問，獲益良多之餘，亦好開心發哥有聽小弟嘅歌曲，去到發哥咁樣嘅地位，都仍然咁諗身邊人感受，呢樣嘢係好值得我學習，除咗對公司團隊外，我都希望對廣大市民好啲，目的唔係令到佢哋點樣鍾意我，反而係希望真係好似發哥所講，係好似親戚關係咁！」

文：陳偉立　

採：蔡振龍、關穎賢　

攝：秦健輝、張福宏、唐豁莊