發哥彈開林峯 親手捕佘
抖咗兩日，Fans等到頸都長！第六集《我愛發哥》昨日在《東網巨星》App播出，今集神級影帝周潤發接受兩屆視后佘詩曼「挑戰」！發哥話好鍾意睇阿佘演戲，仲搞笑叫阿佘老拍檔林峯行開，話要親自同阿佘演對手戲！
阿佘：「我好鍾意演戲，亦好欣賞識得演戲、同我可以向佢學習嘅人，發哥當然係No.1，佢氣場好大，無論演咩角色都入型入格，好細緻嘅位都做得好好！好難呀！我覺得發哥好勁！」
發哥：「阿佘，你又客氣喇！我睇你戲睇到大，我細細個就睇你嘅戲！（佘：唔係啩？）由你第一套TVB出嚟，到同陳豪演公主，最近個咩姐話？犀利啦！殺晒呀！又攞埋獎，我都要向你學習，估唔到你演喜劇咁好睇，又好笑！我嗰時都不知幾想叫林峯『你行開啦，等我做啦！』（佘：哈哈哈！好呀！）不過，林峯係靚仔嘅，有機會跟你學習！光仔冇話我好仰慕你咩？你個御用化妝師呀！」
Firm面靠兜巴星
阿佘：「我想知發哥為拍嘢有時要增肥，有時又要減肥，點解塊面仲咁Firm？」
發哥：「呢個問題好難答你，我一唔聽話，我老婆就兜巴摑埋嚟，摑完左面摑右面，你唔Firm就有鬼啦！你唔好周圍同人講呀！我自己知咋！」
得到發哥稱讚及回覆，阿佘當堂笑到見牙唔見眼，自比心情如小學生獲讚：「多謝發哥讚我，好開心好開心，好似小學生貼堂咁，我都好希望有機會同你合作，發夢都冇諗過，希望有機會向你學習！」
文：陳偉立 採：羅宛君、林希孺
攝：秦健輝、李廣成、黎志輝