陳琪食住韓流 7位數搞網購

於無綫默默耕耘的陳琪,實情禾稈冚珍珠,最近與拍檔合資百萬美金搞韓國網購生意!日前她被發現拎住約七萬元名牌手袋,與丈夫胡諾言到尖沙咀睇舖位,又到月費過萬的學校湊女放學,對於被指過富貴生活,陳琪自嘲只屬小康之家,但今次創業要出資七位數,動用了兩個女兒的教育基金,絕對是孤注一擲,壓力甚大!

藝人陳琪加入無綫20年以來一直發展平平,雖然收入並非豐厚,但原來其家境相當不錯,父母有投資生意,而陳琪當演員以外,還有兼任投資顧問,再加上丈夫胡諾言亦有不少廣告及登台收入,故一家四口絕對生活無憂,「儲備豐厚」的陳琪近日更與拍檔豪擲百萬美金(約800萬港元)創業,大搞韓國女裝網購生意,目前更與當地一些著名品牌達成合作,開展商機。

挽靚袋讀貴價學校

面對近年一股崇韓潮,陳琪也追趕韓風潮流,拍板搞生意前已花了一段時間了解市場,更諗計仔突圍而出,據知伊人睇準市面上充斥翻版貨,為令消費者買得安心,故將打正旗號賣正貨,除直接向品牌商攞貨,又設不滿意退貨選擇,更將於每件貨品包裝上印製標籤,作為追蹤貨品運送位置,以確保貨品獨一無二,而該網站近日已進行試業階段,初步已有40多個韓國牌子供選擇。

日前陳琪與胡諾言被發現到九龍塘接細女放學,據知該學校學費不菲,月費過萬元,見當日學校門口停泊了一架數百萬名車,顯然內裏學生非富則貴。而夫婦接完囡囡後,便由胡諾言駕車到尖沙咀,與一名男子會面後,再一起進入一個正在放租的舖位,見陳琪手拎約七萬元名牌手袋四圍行仔細研究,又不時與老公密密斟,眾人逗留約20分鐘才離開,現場所見,該舖位面積近千呎,市值租金約20萬元。

「老公叫唔好輸晒」

對於大手筆搞網購,陳琪昨日接受電話訪問時笑謂:「因為拍戲時間唔穩定,想多啲時間湊女,同老公呻過,佢叫我試吓搵啲嘢搞。(投資100萬美金喎!)咁唔係一個人畀晒,幾個人投資嘅,其中一個係某大型網購嘅前高層,但都要畀7位數字o架,啲錢係我兩個女嘅教育基金,老公叫我唔好輸晒,所以我都好有壓力!」

文:影視組