舟山久美子識襯 拉高嬌小女生
日本模特兒舟山久美子在日模界發展不錯，近日更到香港為其主持的日本節目宣傳。個子不高的舟山又創立個人品牌，主打嬌小女生市場，讓顧客們透過襯衫，感覺會高一點，舟山亦希望可衝出國際，將品牌打入歐洲！
日模舟山久美子早前出席香港影視娛樂博覽，宣傳她的時尚節目，她透露將在節目推廣日本文化：「我第三次嚟香港，節目中我會同大家講啲日本嘅得意嘢，例如文化、衫同配搭技巧等，節目中加埋我有六個主持，香港都會播放。」
恨拍佐藤健
問舟山會否考慮在港取景？她表示：「香港好多設計都好得意，但如果做節目，要明白香港女仔對『得意』嘅定義係乜。（覺得香港女仔點？）好得意，雖然佢哋個子唔高，但覺得佢哋好可愛。我身高都係1米55，都有出書教人點着衫睇起嚟高啲。」
在日模界發展成功的舟山坦言，希望一嘗拍劇滋味：「我好想拍啲可愛題材嘅日劇，希望大家睇完會開心。（想同邊個男星合作？）佐藤健（《浪客劍心》男主角）！好耐之前同佢拍過廣告，嗰陣已經覺得佢好溫柔體貼。」
擬巴黎開舖
舟山雖然個子不高，但靠自己的穿搭配襯打出名堂，更創立自己的個人品牌，對此她說：「希望自己嘅品牌會好有名同成功。（會唔會開舖？）希望最快今年，除咗喺日本，都想喺巴黎開舖，因為我好鍾意巴黎。（目標顧客係？）嬌小身形嘅女仔，喺網上就會買到。」
文：專案組
攝：劉斌
場地：The Oyster House