黃智賢遭鱷噬 血濺西貢
藝人黃智賢日前偕陳慧珊到西貢拍劇，期間被「大鱷」突襲扯他落水，掙扎時遭蠔殼鎅到手都標血，認真搏命！而回巢拍劇的陳慧珊則大讚劇中一眾後輩有潛質。
黃智賢（Ben）和陳慧珊（Flora）日前在西貢海旁拍攝無綫新劇《波士早晨》，劇情講述坐在石礁釣魚的阿Ben遭大鱷突襲，飾演其秘書的Flora在岸邊出手相救，最終阿Ben被鱷魚扯落水。慘變「落湯雞」的阿Ben於拍攝期間，出盡全力揈手揈腳扮掙扎，豈料左手不慎被蠔殼割破，需暫停拍攝上岸止血，Flora見狀亦上前慰問，工作人員幫手消毒時，阿Ben痛得乸口乸面，他嘆道：「我戴咗護腰、護膝，乜都護晒，係護唔到手指，估唔到做少樣嘢就中招！」
日以繼夜趕戲
提到該劇當日通宵拍到凌晨，小睡三個鐘又再出外景，敬業樂業的阿Ben稱「仲頂得順」：「啱啱食完飯真係有啲眼瞓，但浸一浸水醒咗，然後標一標血再醒啲。」
至於近年甚少在港拍劇的Flora，又獲三名粉絲山長水遠來探班，她識做地跟影迷合照，相當親民，Flora表示粉絲已跟隨她十多年：「我睇住佢哋大，有啲結咗婚、有啲生埋小朋友，都戥佢哋開心。呢十幾年嚟，佢哋每年都幫我搞生日會，好開心佢哋好支持我。」
陳慧珊讚後輩
對於今次拍攝《波》劇，她又認為是個新嘗試，更大讚劇中一班後輩，如洪永城、李佳芯、何傲兒等有潛質：「心目中都有幾個係睇好，通常去到呢個階段，我哋都係帶大啲新人，但佢哋唔使我哋指點，佢哋好叻、自動波，我哋只係喺背後支持佢哋。」
文：影視組