盧巧音口痕復出貪過癮

歌手盧巧音（Candy）的經典歌《三角誌》、《垃圾》、《好心分手》等，至今仍是卡拉OK的必唱歌！當時甚受歡迎的她，突然宣布退出幕前，Candy解釋：「退居幕後係因為當時我睇唔到幕前仲有咩可以玩，幕前嘅工作自己都想抖吓。咁啱老公隊Band又有啲嘢要幫手，就轉去做幕後。對於復出全因緣分，依家同老公簽咗同一間公司，係細公司嚟，感覺比喺大公司易溝通。加上有個監製係我好想合作嘅，就不如試吓。」

新歌發放正能量

一如Candy過往路線，新歌《哲學家》亦屬較陰沉類型。Candy坦言以往的歌曲較適合失戀的人聽，不過今次的新歌雖然節奏陰沉，但歌詞充滿正能量。Candy笑言：「我希望喺陰沉中帶畀大家正能量！（有歌迷聽完後感動落淚。）都係第一次有人話我知，聽我啲歌聽到喊，佢感動，我仲感動。」

盧巧音坦言退居幕後期間，仍非常掛住歌迷。

盧巧音指與老公Sammy都專注在音樂上搏殺，稍後才生B。

新歌歌詞由著名填詞人黃偉文（Wyman）操刀，Candy坦言不常與Wyman聯絡，所以考慮近半天才找他幫忙：「唔知打畀佢好，定send email好，驚佢忙會拒絕我。」她又很玄地透露由她一人「揹飛」的新歌MV正在籌備中：「用嘅道具會係觸摸唔到嘅！」

先誕專輯後生Ｂ

Candy 2013年與老公Sammy結婚後，一直被外界催生B。不過Candy表示夫婦二人暫時都專注在音樂方面，生住音樂作品先：「佢哋應該暑假生，我就年底生。我覺得無論係籌備緊定BB出世後，都要擺好多心思。大家都喺音樂上搏殺緊，咁不如做完先。」Candy表示與老公都有做Gym習慣，認為鍛煉好身體是最重要。

文：專案組

場地：Mira Moon

化妝：YOLA HUN

服裝：rncfashiononline

髮型：Winky Wong@private i