杜汶澤提拔化妝師床上激戰

阿澤近日忙於拍攝英皇電影《選老坐》,據悉該片將社團最黑暗一面搬上大銀幕,片中不乏暴力色情鏡頭,而戲中需要一位精通艷舞兼火辣演出的女角,有指阿澤事前碌盡人情卡仍未找到合適人選,最終造就其化妝師陳意嵐(Coco)由幕後跑到幕前!

出動逾百臨時演員

原來Coco一直醉心演戲,早前更往外地修讀相關課程,其誠意令阿澤大為感動,加上擁有標致面孔唔錫身,故阿澤將她推薦給《選》片導演邱禮濤,雙方一拍即合,而Coco更被太陽娛樂羅致旗下,未來日子將予以力捧。阿澤昨接受電話訪問笑謂﹕「希望佢前途似錦。(要搵過個化妝師?)咁都冇辦法,唔好阻人搵食嘛。」戲中阿澤與Coco更有激烈床戲,且獲太太田蕊妮全力支持,「攞正牌」一親香澤。

另外,阿澤前晚夥拍陳家樂及姜皓文等,於尖沙咀街頭拍攝講數場面,出動逾百臨時演員,鄭中基更專程前往探班。問到阿澤拍攝時會否受騷擾?他答:「比想像中順利,好快就竣工。香港治安真係好好,以前喺酒吧區拍呢啲場面都驚麻煩,依家最嘈最麻煩嘅只係我哋(劇組),全場淨係得『暴龍哥』(鄭中基)夠膽向人收錢咋。」

文﹕影視組