孫佳君：呢半年最開心！

孫佳君近月與法籍三星米芝蓮大廚男友Olivier愛得sweet，貴為兩子之母的她，坦言現在正是她「最開心的時間」，她說：「依家都可以話係我最開心嘅時間，因為小朋友都大咗，我可以輕鬆啲，以前要做家庭主婦，依家可以放心去做我喜歡嘅工作，以前單親媽媽湊小朋友嘅日子真係好lonely！（兩個仔接受你有男友？）男友其實都係個大細路，佢同我兩個仔都好玩得埋，一齊打機，反而係我完全融入唔到佢哋嘅世界，因為我都唔鍾意打機，唔鍾意踢波，但男友就可以同佢哋好傾得埋。（你為照顧家庭，之前刻意唔搵男友？）係時機未遇上啫！」

廚藝贏盡人心

孫佳君更透露男友的米芝蓮級廚藝贏盡人心：「我兩個仔都好鍾意男友煮嘅嘢食，我就好欣賞佢可以煮到啲好高難度嘅菜式，我最鍾意佢煎嘅牛扒，煎得真係好好，佢做嘅沙律、海鮮都好好味。（你會同佢一齊落廚煮飯仔？）唔會，我會好大壓力！（會考慮再組織家庭？）其實我哋都只係識咗6個月，未諗到咁長遠，但我兩個仔好鼓勵我做我喜歡嘅事，總之呢個moment，我係最開心！」

做Sa媽入晒戲

提到在電影《雛妓》演蔡卓妍（阿Sa）母親而贏盡掌聲，孫佳君說：「起初叫我做佢媽咪，朋友都覺得好奇怪，但劇情講係回憶嘅。（你都要老妝示人？）我鍾意真實感，唔使次次都靚樣示人嘅！有場講我喺阿Sa房喊，我唔係易喊嘅人，好多謝邱禮濤導演解釋得好好，帶到我入戲。（冇提名覺得可惜？）我OK，等下次囉！」

場地：La Locanda

文：影視組

攝：鄭家俊