童年方展博 做繼承者育16歲仔

近日《大時代》掀起熱潮，於劇中演主角「方展博」童年的黃寶龍，轉眼已變成金毛文藝熟男，他對反應熱烈坦言感高興，大讚劇集值得一睇再睇。講到當年與劉松仁最多對手戲，他笑言「細路仔唔識世界」，激到對方紮紮跳，又讚松哥演技冇得彈。但自《大》劇後就未有出現於電視上淡出幕前，他坦言青春期時介意同學對他指指點點。

做好家族書局

問到最深刻一幕，有過百部作品的黃寶龍就精挑細選了與唐寧在《4個32A和一個香蕉少年》的「螢幕初吻」，但他笑言並不Enjoy：「拍嗰時成二三十人！其實可以錫好啲。」他又謂與唐寧是「最佳拍檔」，再有機會合作的話想做夫妻。他又直言想「復出」，希望嘗試飾演專業人士，要幾pro有幾pro，不過大前提是家族生意「精神書局」要上軌道：「近兩三年見租金壓力咁大，想幫手搞網上宣傳、電台訪問。」

而黃寶龍亦直言本來對書局生意以至睇書都冇大興趣：「依家雖然有電子書，但有本書喺手會更集中。我開頭都冇興趣，但幫到人搵書又幾有成功感！」坦言對書店有使命感、更會親自上門收書：「唔想冇人接手又經營不善，想令書局有6、70年。」

蜜運冇諗再婚

講到感情生活，於18歲結婚後離婚的黃寶龍，已有一名16歲兒子，他坦言與前度在無綫認識：「佢做廣告我去casting，最後溝通出現問題而分開。」他又提到從未想過要兒子繼承書店：「唔會逼佢，要自己接觸咗有興趣先會投入，有keep住同佢見面但唔會干涉佢嘅成長。」現時亦有位拍拖兩三年的女友，未想過再婚：「咁穩定就唔使心急啦，依家相處得好舒服！」他又謂一開始就坦白曾結婚及已當爸爸，若對方介意就不會勉強走在一起。

文：陳丹

攝：劉智源