陳慧珊初演喜劇癲得過癮

黃智賢（Ben）與陳慧珊（Flora）昨晨聯同李佳芯（Ali）、洪永城（Tony）為無綫新劇《波士早晨》到西貢取景，劇情講述飾演秘書的Flora和Ali，以一副「羅拉look」手持弓箭，向化身箭靶的「老闆」阿Ben和Tony射箭，受盡折磨的兩男一臉痛苦，場面搞笑。

在劇中Flora與阿Ben多次互相廝殺，Flora笑謂：「佢恰咗我廿集，梗要射吓佢啦！」自言未拍過喜劇的她稱好玩，在旁的阿Ben也大讚對方有潛質：「佢都幾癲o架，有時又諗啲idea放喺裏頭，佢嘅喜劇細胞都okay。」一對冤家又大爆不乏咀嘴戲，阿Ben更狼死地笑說：「呢啲唔使問，一定有，冇就自己加！」被逗得哈哈大笑的Flora則表示劇情需要也會專注去做。

黃智賢充滿喜劇細胞，盡情搞笑。

洪永城慘被作箭靶，李佳芯在旁笑哈哈。

盡情搞笑兼扮醜

談到阿Ben與Flora首次合作，Flora即認細笑道：「我由細睇到佢大，佢唔信之嘛，我未入行已經睇佢。（合作完覺得佢點？）好好，大家都好專業、好有默契。」她透露拍畢《波》劇後，會重投私下工作及讀書，問會否恨再拍喜劇？她說：「冇乜所謂，總之天時地利人和，所有嘢時間啱就拍，今次都有扮醜，我哋盡情地搞笑。（之後想拍劇？）啱時間就拍，我都鍾意呢行、鍾意拍戲。」

永城佳芯耍花槍

至於Tony則大嘆戲外遭Ali折磨，Ali卻大爆對方自戀：「我最多話佢成日跟住鏡頭走，無論鏡頭喺邊，佢都要向住chok樣！」並謂拍親熱戲時Tony特別多主意，笑指對方的花招較不踏實，Tony則笑謂：「臨拍前我諗好多拍攝方法，例如坐枱、喺床上輾轉反側，但導演全部唔buy。」問兩人大耍花槍，怕否女友唐詩詠呷醋？Tony即大派定心丸直言不會。

文：影視組