陳瀅食物中毒照開工

女星陳瀅出席活動時自爆食物中毒,嘔了一整晚,但來港多年的她竟沒有在港看過醫生,亦不打算就醫,自行以薑茶和睡眠來醫治,認真趣致!

昨晚陳瀅、男星王宗堯及組合24味等一同出席時裝活動,其中以一身紅裙現身的陳瀅一臉虛弱,透露自己食物中毒,她說:「我之前一晚食咗生蠔同蟹,跟住好唔舒服,嘔咗成晚,(要call白車?)唔使,嘔完即刻就飲番落糖嘅薑茶同水,依家都唔敢食嘢,驚一食就嘔,又有發燒,(睇咗醫生未?)冇睇,之前喺溫哥華住,嚟咗香港幾年,都冇睇過醫生,我諗住瞓幾晚就冇事。」

拒周志文追求

此外,談到有傳緋聞男友周志文因形象花弗而不獲TVB續約?她即劃清界線說:「佢冇追過我,唔知點解會被捲入去,(有冇慰問佢?)我冇向佢問近況,不過都希望佢冇事,我唔係同佢太熟,(咁佢係咪好花弗?)唔清楚,唔算溝通好多。(如果佢追你受唔受?)應該唔會,佢近來都好多事困擾,佢處理吓自己啲事先啦,同埋我都唔太鍾意咁多新聞嘅人。」

王宗堯讚TVB

而同場的王宗堯對於TVB獲續牌十二年,他大讚TVB劇集有改善:「唔畀佢哋,香港都冇第二個台,但都唔希望香港得番一個台,希望佢哋繼續努力,令香港好啲。」

文:名人組