陳嘉容佩服媽咪孭成頭家
明天是母親節，為頌親恩，圈中藝人齊齊在《東網巨星》的「巨星最愛–母親節篇」為媽咪送上最真誠的心聲！已為人母羅霖坦言母親至今都是獻出200%的照顧，風雨不改；名模陳嘉容就表示母親為他們幾兄弟姊妹成長，一直含辛茹苦，而HotCha成員張惠雅（Regen）更大讚母親的私家湯水頂呱呱！
陳嘉容
我心目中嘅最愛就係媽媽，我要多謝佢由細到大嘅照顧，喺我小時候媽媽去做工人，好辛苦咁獨自養大我哋幾兄弟姊妹，人生經歷咗好多事情，所以我一生之中最愛同敬佩一定係我媽咪。
羅霖
我嘅最愛係媽媽，無論以前有哮喘定生咗3個小朋友都好，佢都係200%嘅照顧，冇佢我人生就冇咁順利。工作上佢畀好多意見我，好似我選亞姐時，唔想喺公園着泳衣，係佢同我講要做就做到最好，不斷支持我，好多謝佢令我學到好多嘢，我係最學唔到佢煮到成枱好餸。
張惠雅（Regen）
我最愛係媽咪，佢非常犀利，成日Check住我喺網上嘅留言同行蹤，只要我話有少少不適，隔夜就會煲湯水我飲，自己都差唔多三十歲，希望可以報答媽咪，努力工作賺錢照顧佢。
吳業坤
我要最多謝一個人就係媽咪嘞，因為佢對我嘅照顧係無微不至，佢係我喺屋企嘅私人助理，做嘢要着邊套衫，媽咪就會為我準備好，有時連副眼鏡唔知放咗邊度，佢乜都可以幫我搵到。每晚返到屋企媽咪又會為我準備靚湯。