蝦頭穿越時空 古裝人跌電話

楊詩敏(蝦頭)昨日為古裝劇拍攝外景,期間「穿越時空」不慎將身上的手提電話跌在地上,十分蝦碌。事後她解釋因正等一個緊急電話所致,但否認是等緋聞男友邵子風的來電。

藝人黎耀祥、胡定欣、蕭正楠、林夏薇和楊詩敏(蝦頭)等人,昨日在將軍澳電視城古裝街,為無綫劇《公公出宮》拍攝外景。期間,蝦頭不慎將手提電話跌在地上,幸好當時已經停機故未有影響拍攝進度,事後她解釋:「因為等一個緊急電話,所以將部電話攝咗喺褲邊。點知原來嗰場戲要我隔開啲人群,動作太大就唔小心跌咗部機落地。平時好少咁o架,通常都將部電話擺低先拍,今次真係第一次。」

問她是否等男友的來電?她說:「唔係,係等屋企人一個緊急電話。(與邵子風關係怎樣?)關係一向都很好,了解當中。我哋呢啲中女,唔可以投入咁多,順其自然啦。」

黎耀祥仔考大學

同場,黎耀祥透露兒子今年中五即將考大學試,他明白成績不代表一切,故自己亦不緊張,他說:「佢就希望留港讀書,不過個仔思想比較成熟,話想考保險經紀牌。(叫你介紹藝人畀佢賣保險?)個仔同佢哋仲熟過我啦,唔使我介紹。呢套劇佢都有嚟探班,同蕭正楠、曹永廉不知幾熟。就算由我幫佢開第一份保險單都冇所謂。」

胡定欣寫信溝通

另外,胡定欣被問將會到開平拍攝一個月外景,與緋聞音樂人男友Terry是否冇得見面,她表示:「大家仍在了解中,現時科技發達。(當地可能無wifi?)咁寫信囉!」胡定欣透露開平天氣酷熱,會自備消暑用品到當地。

文:影視組