王浩信旺角怒奔朱千雪伸脷觀「鳥」
王浩信於旺角街頭「晨鵰」乍現，一大清早只穿內褲穿插橫街窄巷，更手拖雪妮姐東奔西走，在旁的朱千雪睇到伸晒脷，面對搏到盡的浩信只好認低威服輸：「我就算着三點式都多布過佢！」
藝人王浩信昨早偕朱千雪於旺角街頭為無綫新劇《EU超時任務》拍攝外景，雖見天氣稍熱，惟浩信一身造型未免過分清涼，竟然搏到盡脫剩底褲，拖住劇中的媽媽雪妮姐穿插於橫街窄巷，之後更將雪妮姐孭上背，同場的千雪見狀都伸脷笑言認輸：「今次我真係輸晒！我就算着三點式都多布過佢！（再着少布啲？）電視個尺度應該唔得！」調皮的浩信亦笑認尷尬，難怪與雪妮姐合照時，將她推在前方暫遮「晨鵰」。
加送豬腩肉
原來浩信今次「晨鵰」乍現並非貪得意為晒而晒，而是劇情中演「土豪村長」的他以身作則示範諺語「輸剩條底褲」兼救輸錢雪妮媽，況且一向身材好的浩信今次明顯欠操練，「晨鵰」乍現之餘亦驚現豬腩肉，他解釋要配合角色特意增磅：「肥咗十磅！其實之前拍《東坡家事》做摔跤手都除過（衫）o架喇，今次監製都叫我盡食，叫我老婆咩都整啲，食腩肉呀，多兩碗白飯，仲食埋消夜！一路食一路內疚，仲要得一個月時間增肥，我都盡食o架喇。（今日可有打底？）唔知着底褲仲可以點打底！」
讚老公專業
今次《EU超時任務》除剝剩底褲大膽場口，原來千雪之前更出手摑了浩信一巴，千雪說：「我哋排緊戲嗰時唔覺意真係打咗佢一巴，太投入喇！」浩信則打趣自嘲「賤男」謂：「今次我真係成日都畀佢打，我個角色係一個賤男，有次仲畀千雪呢個差婆逼供，畀人打得最甘都係呢套劇。（摑咗幾多巴？）真實就一次啫，其他唔好提喇！」
對於王浩信穿底褲晒「晨鵰」，老婆陳自瑤（YoYo）表示不怕老公被睇蝕：「平時去沙灘游水着泳褲都一樣！只係依家搬咗出市區啫！（覺得老公身形點？）OK啦！睇佢自己滿唔滿意，我唔太高要求！」問到夫妻檔性感演出會否駕輕就熟？YoYo沒抗拒說：「睇劇情有咩需要，作為一個演員，唔理係咪老公，工作上都係對手，我哋好專業！」
文：影視組