莊思敏家居解「扣」無bra一身輕
隆胸後的莊思敏上圍極有睇頭，每次出席活動都會作性感打扮，她對於真空上陣大呼舒服。原來她平時一返到屋企就會第一時間「解除束縛」、坦蕩蕩，享受冇壓力狀態下的舒暢，所以家中絕對外人止步。
藝人莊思敏（Jacquelin）、林德信（Alex）、「宅男女神」陳瀅、名模琦琦、陳嘉容、Jessica C.、鍾浠文等前晚出席時裝旗艦店開幕活動，一向性感打扮的Jacquelin身穿胸口通窿性感長裙，她自爆今次真空上陣，但十分安全：「條裙係箍頸嘅，唔驚會甩，只用咗乳貼，唔戴bra真係好舒服。」
禁妹思明帶朋友回家
Jacquelin表示每次外出返家後會立即除bra，故此不讓其他人上屋企，由於與妹妹莊思明（Lisa）同住，所以同樣會阻止Lisa帶朋友回家。問到有否見過Lisa和陳司翰一起回家？Jacquelin說：「少見到司翰，唔知佢哋復合，上次見都係二月喺Lisa生日會見到。」有指Lisa和司翰是第四度復合，Jacquelin即謂有經歷是好事，交朋友最緊要開心。
林德信唔肯爭寧讓愛
另外，最近與周柏豪和劉心悠合作拍畢電影《我老婆係明星》的Alex坦言愛上演戲，在戲中飾演搶人老婆、同人爭女的壞人。在現實生活中，Alex表示不會爭女，而是讓愛，問到若果有人來爭緋聞女友松岡李那，Alex笑說：「唔爭o架，我好大方，如果佢要我就會揀我，我唔會逼人做嘢，否則兩個人都會唔開心。」因早前拍戲而疏於運動的Alex謂接下來有個瑜伽馬拉松，要教1,000個女仔瑜伽，令他諗起都怕怕。
文：名人組