海味回港谷劇 遮胸唔可惜

周海媚昨晚到港準備今日到無綫出席劇集《武則天》記者會,她受訪時表示對劇集在港播出充滿信心,覺得無綫的版本比起內地播出的「大頭版」好好多,講到「谷胸」造型被遮蓋,埋沒了她的好身材,周海媚笑說:「我唔係幾美好,麻麻哋啫。」

無綫將於4月26日播出在內地大受歡迎的劇集《武則天》,為隆重其事,今日邀請了劇中主角范冰冰、李治廷及周海媚(海味)到將軍澳電視城進行記者會。周海媚昨晚約七時到港,無綫派出香港小姐亞軍王卓淇前往接機。未有化妝的周海媚戴上帽子及太陽眼鏡現身,她受訪表示:「好耐冇喺香港宣傳劇集,但都有返香港休息同探屋企人。(恨返香港拍劇?)冇話恨唔恨嘅,喺內地都好多工作,過年後都冇休息過。(收視有冇壓力﹖)冇,收視會繼續好好,都好耐冇作品喺香港上映,好開心。」

今午出席記招

《武》眾女星原本在劇中谷胸演出,但因尺度問題於內地變成「大頭版」,香港版本也花了千五萬人民幣後期製作,為女角穿上「小背心」,她說:「自己只睇過相,未睇過片,最緊要滿意效果。(美好身段被遮蓋可惜?)我唔係幾美好,麻麻哋啫。最重要係原汁原味呈現畫面,cut到大頭版真係可惜,啲頭飾好重,衫、景都好靚,但係就乜都睇唔到,拉番高就可以睇番晒。聽聞台灣會播足本版,都託朋友幫我買DVD。」至於范冰冰的行蹤卻十分保密,據悉她昨日已到港,但要到今日下午才現身記者會。

陳貝兒學御夫

此外,陳貝兒為《武》記者會擔任司儀,首次與范冰冰同台的她感到緊張,加上隨後要與劇集演員做專訪,故在家中狂煲《武》:「其實睇睇吓都唔當係做功課,愈睇愈投入。(冇時間服侍老公?)佢一向都係皇帝,睇完《武》都學到幾時要溫柔、幾時要畀意見,《武》特別適合我哋呢啲『人妻』睇,學御夫術!」

貝兒為《武》犧牲可謂不少,今日撞正她的健康食品店開幕,但最終決定以公司工作行先,待記者會後再加入,投資者之一的她透露整個計劃約投資七位數字。

文:影視組